কেব বিৰোধী প্ৰতিবাদ কৰিবলৈ গৈ গুৱাহাটী আৰু উজনি অসমৰ ডিব্ৰুগড়ত মৃত্যু হোৱা চাৰি গৰাকী যুৱকৰ আত্মাৰ চিৰশান্তি কামনা কৰি শুকুৰবাৰে অল ডিমাচা ষ্টুডেন্ট য়ুনিয়ন (আডছু)ৰ উদ্যোগত হাফলং চহৰৰ ৰাজপথত এক মৌন সমদল উলিওৱা হয়।
হাতে হাতে মমবাতি লৈ হাফলঙৰ বিভিন্ন ভাষা-ভাষী জাতি-জনগোষ্ঠীৰ ৰাইজে উক্ত সমদলত অংশ লয়।
সমদলত ডিমাচা উইমেন ছচাইটি, হিলছ্ ট্ৰাইবছ্ ষ্টুডেন্ট এছচিয়েছন আৰু ডিমাচা মাডাৰ্ছ এছ’চিয়েছনৰ সদস্য সকলেও ভাগ লয়।
হাতে হাতে মমবাতি লৈ হাফলং লালফিল্ডৰ পৰা মৌন প্ৰতিবাদী সমদলৰ আৰম্ভ হৈ হাফলং ৰাজপথৰ উপৰি চিনোড ৰটাৰিৰ মাজেৰে হাফলং জিলা উপায়ুক্ত কাৰ্যালয় চৌহদ আৰু তাৰ পৰা পৰিষদ ৰটাৰি পৰিক্ৰমা কৰি পুনৰ লালফিল্ডত আহি বিশাল সমদলৰ সামৰণি পৰে।
ডিমাচা উইমেন ছচাইটিৰ কেন্দ্ৰীয় সভানেত্ৰী ৰিঙমিলা হোজাইয়ে কয় যে অসমক আমি অবৈধ বিদেশীৰ বিচৰণ ভূমি হবলৈ কেতিয়াও নিদিওঁ। তেওঁ কয় যে ৰাজ্য আৰু কেন্দ্ৰৰ বিজেপি চৰকাৰে আমাৰ লগত প্ৰতাৰণা কৰিছে। কেব সংসদত উত্থাপিত হোৱাৰ আগৰ পৰা প্ৰতিবাদ জনাই অহাৰ পাছতো ৰজাঘৰীয়াই আমাৰ কথা নুশুনিলে। ৰাইজৰ প্ৰতিবাদ আওকাণ কৰি ইতিমধ্যে কেব আইনত পৰিণত হ’ল। আৰু ইয়াৰ প্ৰতিবাদ কৰিবলৈ গৈ চাৰিজনকৈ যুবক নিৰাপত্তা বাহিনীৰ বন্দুকৰ গুলিত প্ৰাণ দিব লগা হ’ল।
ৰিঙমিলা হোজাইয়ে মুখ্য মন্ত্ৰী সৰ্বানন্দ সোনোৱাল, বিত্ত মন্ত্ৰী হিমন্তবিশ্ব শৰ্মা আৰু অগপ সভাপতি তথা মন্ত্ৰী অতুল বৰাক লক্ষ্য কৰি লৈ ক্ষোভ ব্যক্ত কৰে। হোজাইয়ে কয় যে শৰীৰত শেষবিন্দু তেজ থকালৈকে আমি নাগৰিকত্ব সংশোধনী আইনৰ বিৰোধিতা কৰি যাম।
ডিমাচা মাডাৰ্ছ এছ’চিয়েছনৰ সভানেত্ৰী এগনেছ গাৰ্লচায়ো বিধেয়কখনক লৈ ক্ষোভত ফাটি পৰে। গাৰ্লচাই চৰকাৰৰ অসম বিৰোধী কাম কাজৰ তীব্ৰ সমালোচনা কৰে।
তেওঁ কয় যে চৰকাৰে ডিমা হাচাওক নাগৰিকত্ব সংশোধনী বিধেয়কৰ বা আইনৰ পৰা বাহিৰত ৰাখিছে যদিও অসমৰ আন আন প্ৰান্তত এই আইন প্ৰনয়ন কৰা হ’ব যাৰ আমি প্ৰতিবাদ কৰিছো। গাৰ্ল’চাই চৰকাৰৰ সমালোচনা কৰি কয় যে বিজেপি চৰকাৰে জাতি মাটি ভেটি ৰক্ষাৰ মাত মাতি ক্ষমতালৈ আহি জাতি-মাটি-ভেটি বিদেশীৰ হাতত গতাই দিয়াৰ প্ৰতিযোগিতাত নামিছে। ইয়াৰ বিৰুদ্ধে আন্দোলন আৰম্ভ হৈছে আৰু চলি থাকিব।
উল্লেখ্য যে সমদলৰ সামৰণিৰ প্ৰাক্ মুহুৰ্তত নিৰাপত্তাৰক্ষীৰ গুলিত মৃত্যু হোৱা চাৰি যুবকৰ আত্মাৰ চিৰশান্তি কামনা কৰি এক মিনিট নিৰৱতা পালন কৰা হয়।
আডছু সাধাৰণ সম্পাদক পৃথ্বীৰাজ হোজাইয়ে কয় যে আজি আমি অকল মৃতকৰ প্ৰতি শ্ৰদ্ধা জনাই এই মৌন সমদল উলিয়াইছো আৰু অহা সোমবাৰে কেবৰ বিৰুদ্ধে বৃহৎ প্ৰতিবাদী সমদল উলিওৱা হ’ব।
সমদলত হাফলঙৰ কংগ্ৰেছ পৰিষদৰ প্ৰতিনিধি ড্যানিয়া লাংথাছায়ো অংশ লৈ বিজেপি চৰকাৰৰ অসম বিৰোধী ষড়যন্ত্ৰৰ সমালোচনা কৰে।
