বোকাখাত মহকুমাৰ কমাৰ গাঁৱৰ দিহিঙীয়া মহুৰা পথাৰত বিশ্ব ঐতিহ্য কাজিৰঙা সমন্বয় ক্ষেত্ৰ নামেৰে আয়োজন কৰা শ্ৰীমন্ত শংকৰদেৱ সংঘৰ ৮৯ সংখ্যক অধিবেশনলৈ সৰ্বানন্দ সোণোৱাল চৰকাৰৰ মন্ত্ৰী বিধায়কক নিমন্ত্ৰণ নজনাবলৈ আয়োজক সমিতিক আহ্বান জনাইছে অসম জাতীয়তাবাদী যুৱছাত্ৰ পৰিষদে ৷
শ্ৰীমন্ত শংকৰদেৱ সংঘৰ অধিবেশনলৈ যদি ৰাইজে এঘৰীয়া কৰা ৰাজনৈতিক নেতা সকলক নিমন্ত্ৰণ কৰে তেন্তে শংকৰদেৱ সংঘকো ৰাইজে এঘৰীয়া কৰিব বুলি মন্তব্য কৰে যুৱ ছাত্ৰ পৰিষদৰ সভাপতি ৰাণা প্ৰতাপ বৰুৱাই ৷
অধিৱেশনৰ বাবে প্ৰয়োজনীয় অৰ্থৰ বাবে চৰকাৰৰ ওচৰত হাত নেপাতিবলৈ কৈ অসমৰ ৰাইজক মুক্ত হস্তে দান বৰঙণি দিবৰ বাবেও তেওঁ আহ্বান জনায় ৷
ইফালে কেন্দ্ৰীয় চৰকাৰৰ লগতে অসম চৰকাৰৰ মন্ত্ৰী সকলক বদন আখ্যা দি অসম জাতীয়তাবাদী যুৱ ছাত্ৰ পৰিষদৰ বোকাখাত জিলা সমিতিৰ নেতৃত্বই ঘোষণা কৰে যে অধিবেশন থলীলৈ কোনো মন্ত্ৰী বিধায়কৰ আগমন হ’লে যুৱ ছাত্ৰ পৰিষদে গণতান্ত্ৰিক প্ৰতিবাদ সাব্যস্ত কৰিব৷
সংগঠনটোৰ মতে শংকৰ আৰু মাধৱ দেৱৰ আদৰ্শৰে অনুপ্ৰাণিত শ্ৰীমন্ত শংকৰদেৱ সংঘৰ উত্তৰ বোকাখাত অধিবেশনলৈ জাতিয়তাবাদী যুৱ ছাত্ৰ পৰিষদৰ পূৰ্ণ সমৰ্থন আৰু সহযোগিতা আছে ৷
অধিবেশন সাফল্য মণ্ডিত কৰিবৰ বাবে অসমৰ ৰাইজলৈ আহ্বানো জনায় সংগঠনটোয়ে ৷
আনহাতে, নাগৰিকত্ব ( সংশোধনী ) আইনক সমর্থন জনাই থকা চৰকাৰৰ মন্ত্রী, বিধায়কসকল যদি অধিৱেশন থলীলৈ আহে তেন্তে অসম জাতীয়তাবাদী যুৱ ছাত্ৰ পৰিষদৰ তৰফৰ পৰা গণতান্ত্রিকভাবে আন্দোলনৰ কার্যসূচী ল’বলৈ বাধ্য হ’ব বুলি অসম জাতীয়তাবাদী যুৱ ছাত্ৰ পৰিষদৰ কেন্দ্রীয় সমিতিৰ উপ সভাপতি দীপক হাজৰিকায়ো স্পষ্ট কৰি দিছে।
ইয়াৰ বিপৰীতে জাতীয়তাবাদী যুৱ ছাত্ৰ পৰিষদে অসমীয়াক ভালপোৱা প্রতিজন ব্যক্তিক যাতে এই অধিবেশন লৈ আমন্ত্রণ জনায় তাৰ বাবে শ্ৰীমন্ত শংকৰ সংঘৰ আদৰণি সমিতিক আহ্বান জনায় ৷
