আমেৰিকান ডলাৰৰ বিপৰীতে ভাৰতীয় টকাৰ মূল্য অভাৱনীয়ভাৱে হ্ৰাস পাই অহা কাৰ্যক কিদৰে ৰোধ কৰিব পৰা যাব তাকে লৈ এক অদ্ভুট মন্তব্য আগবঢ়াইছে বিজেপি দলৰ জ্যেষ্ঠ নেতা তথা ৰাজ্যসভাৰ সাংসদ সুব্ৰমনিয়ন স্বামীয়ে।
ভাৰতৰ অৰ্থনীতিক সুস্থিৰ অৱস্থালৈ আনিবলৈ হ’লে নেতাগৰাকীয়ে ভাৰতীয় নোটত দেৱী লক্ষ্মীৰ ফটো চপা কৰিব লাগিব বুলি পৰামৰ্শ প্ৰদান কৰে।
বুধবাৰে মধ্যপ্ৰদেশৰ খাণ্ডৱাত এক অনুষ্ঠানত অংশ ল’বলৈ গৈ স্বামীয়ে সংবাদ মাধ্যমৰ আগত এই মন্তব্যটো প্ৰদান কৰিছিল।
ইণ্ডোনেছিয়াৰ নোটত ভগৱান গণেশৰ ফটো ছপা সন্দৰ্ভত কৰা এক প্ৰশ্নৰ উত্তৰত স্বামীয়ে কয়, ‘এই প্ৰশ্নটোৰ উত্তৰ প্ৰধান মন্ত্ৰী নৰেন্দ্ৰ মোদীয়ে দিব পাৰিব। অৱশ্যে মই ইয়াৰ পক্ষত আছো। ভগৱান গণেশে বাধা দূৰ কৰে। ভাৰতীয় নোটত দেৱী লক্ষ্মীৰ ফটো চপা কৰিলে ভাৰতৰ অৰ্থনীতি সুস্থিৰ অৱস্থালৈ ঘূৰি আহিব পাৰে। এই কথাত কোনেও বেয়া পাব নালাগে’।
উল্লেখ্য যে হাৰ্ভাৰ্দ ইকনমিষ্ট সুব্ৰমনিয়ন স্বামীয়ে ভাৰতীয় অৰ্থনীতিৰ এনে অৱস্থাৰ বাবে চৰকাৰৰ বিভিন্ন কাৰ্যপন্থাক সমালোচনা কৰি অহাৰ লগতে ইয়াৰ পৰা পৰিত্ৰান পাবলৈ বিভিন্ন সময়ত বিভিন্ন মন্তব্য তথা পৰামৰ্শও প্ৰদান কৰি আহিছে।
ইয়াৰ উপৰি উক্ত অনুষ্ঠানত বিজেপি নেতাগৰাকীয়ে নাগৰিকত্ব সংশোধনী আইন সম্পৰ্কেও নিজৰ মত প্ৰকাশ কৰে। তেওঁ এই আইনখনক লৈ আপত্তি কৰিবলগীয়া একো নাই বুলি কয়।
স্বামীয়ে কয়, ‘২০০৩ চনতে কংগ্ৰেছ নেতা তথা প্ৰাক্তন প্ৰধান মন্ত্ৰী মনমোহন সিঙে পাকিস্তানৰ সংখ্যালঘু সকলক নাগৰিকত্ব দিয়াৰ বাবে সংসদত আবেদন জনাইছিল। আমি এইখন লৈ আহিলো। এতিয়া কংগ্ৰেছে এইখন মানিব খোজা নাই আৰু কৈ আছে আমি পাকিস্তানৰ মুছলমানসকলৰ লগত অন্যায় কৰিলো। আমাৰ অন্যায় কি? পাকিস্তানৰ মুছলমানসকল ইয়ালৈ আহিব নিবিচাৰে। ইয়ালৈ আহিবলৈ আমি তেওঁলোকক বাধ্য কৰিব নোৱাৰো’।
