ভাৰতৰ অৰ্থনীতিত পৰ্যটনৰ গুৰুত্বৰ বাবে ইতিবাচক সজাগতাৰ বাবে সমগ্ৰ ভাৰতৰ পৰ্যটন ক্ষেত্ৰতে শনিবাৰে ৰাষ্ট্ৰীয় পৰ্যটন দিৱস উদযাপন কৰা হৈছে যদিও এই ক্ষেত্ৰত অৱহেলিত হৈ ৰ’ল বিশ্বৰ ঐতিহ্য ক্ষেত্ৰ কাজিৰঙা ৷
পৰ্যটনৰ বিকাশৰ বাবে প্ৰিয়ংকা চোপ্ৰাৰ লগত লক্ষ লক্ষ টকা ব্যয় কৰা পৰ্যটন বিভাগ যেন এতিয়া ঘোৰ নিদ্ৰাত।
কাজিৰঙাত পৰ্যটন বিভাগৰ যুটীয়া সঞ্চালকৰ কাৰ্যালয় থকাৰ পাছতো ৰাষ্ট্ৰীয় পৰ্যটন দিৱস উদযাপন নোহোৱাতো অতি পৰিতাপৰ বিষয় ৷
ইফালে পৰ্যটন বিভাগৰ কাজিৰঙাৰ কহঁৰাত আছে জুপুৰী ঘৰ, অৰণ্য, কুঞ্জবন, বনশ্ৰী, বনানিৰ উপৰিও অগৰাতলিতো আছে পৰ্যটন নিবাস ৷
শনিবাৰে ৰাষ্ট্ৰীয় পৰ্যটন দিৱসৰ দিনা এই পৰ্যটন নিবাস সমুহৰ জৰাজীৰ্ণ ৰূপে উদঙাইছে অসমৰ পৰ্যটন বিভাগৰ কাণ্ড জ্ঞানহীন ফোপোলা স্বৰূপ ৷
পৰিচালনা আৰু মেৰামতিৰ অভাৱত বন্ধ আৰু জহিখহি গৈছে এই বিভাগীয় পৰ্যটন নিবাস বোৰ ৷
বন্ধ হৈ আছে জুপুৰী নামৰ আৱাসতো ৷ বিগত দুটা বছৰেও সম্পূৰ্ণ নহল বোকাখাতত পুনৰ নিৰ্মান কৰি থকা প্ৰশান্তি নামৰ নিৱাসটোও ৷ কহঁৰাৰ দুটাকৈ পৰ্যটন নিৱাস ইতিমধ্যে জহি-খহি শেষ হ’ল ৷
দেশৰ লগতে ৰাজ্য পৰ্যটনৰ ক্ষেত্ৰলৈ কাজিৰঙাৰ অৱদান অনস্বীকাৰ্য ৷ বিভাগীয় তথ্য মতে বিগত ২০১৭-১৮ পৰ্যটন বৰ্ষত ৮,৫৩৭ জন বিদেশী পৰ্যটকৰ লগতে ১,৭৯,১৭৩ দেশীয় পৰ্যটক আহিছিল আৰু সংগৃহীত হৈছিল ৫,৬০,২২,২৯৫ টকাৰ ৰাজহ ৷
২০১৮-২০১৯ বৰ্ষত কাজিৰঙালৈ আহিছিল ৭,৪৪৩ জন বিদেশী আৰু ১,৬৮,৭৩৮ জন দেশী পৰ্যটক আৰু ৪,৮২,৪২,২২৯ টকাৰ ৰাজহ সংগৃহীত হৈছিল ৷
চলিত বৰ্ষৰ এতিয়ালৈকে ৬,৬৮৭জন বিদেশীৰ বিপৰীতে ৯৬,১৪৯ জন দেশী পৰ্যটকৰ বিপৰীতে সংগৃহীত হৈছে ২,৮১,৮৪,৮৫২ টকাৰ ৰাজহ ৷
ইয়াৰ পাছতো কাজিৰঙাত ৰাষ্ট্ৰীয় পৰ্যটন দিৱসৰ কোনো ধৰণৰ কাৰ্যসুচী ৰূপায়ণ নতৰাতো বিশেষভাৱে তাৎপৰ্যপূৰ্ণ বুলি বিবেচিত হৈছে ৷
পৰ্যটনৰ বিজ্ঞাপনৰ বাবে কোটিৰ ঘৰত ৰাজকোষৰ ধন ব্যয় কৰা অসমৰ পৰ্যটন বিভাগটোৰ এনে কাৰ্যই আচৰিত কৰিছে সকলোকে ৷ ই পৰ্যটনৰ সৈতে জড়িত স্থানীয় লোকসকলকো ক্ষুভিত কৰি তুলিছে ৷
