আজিৰেপৰা ৰাজ্যত হাইস্কুল শিক্ষান্ত পৰীক্ষা আৰম্ভ হৈছে। এইবাৰ পৰীক্ষাত ৰাজ্যৰ মুঠ ৩,৫৮,৪৪৬ গৰাকী পৰীক্ষাৰ্থী অৱতীৰ্ণ হৈছে।
হাইস্কুল শিক্ষান্ত পৰীক্ষাত অৱতীৰ্ণ হোৱাৰ পৰা বঞ্চিত হ’ব লগা হ’ল বোকাখাত মহকুমাৰ দ্বিতীয় পৰঙনীয়া গাঁৱৰ এগৰাকী মেধাবী ছাত্ৰী।
কুৰুৱাবাহী উচ্চতৰ মাধ্যমিক বিদ্যালয়ৰ ছাত্রী গৰাকী নিশা পৰীক্ষাৰ বাবে অধ্যয়ণ কৰি থকা অৱস্থাত ২১ জানুৱাৰিৰ পৰাই নিখোঁজ হৈ আছে।
ইফালে, পৰিয়ালৰ লোকে ছোৱালীজনী নিৰুদ্দেশ হোৱাৰ নিশাই বোকাথাত আৰক্ষী থানাত এখন এজাহাৰ দাখিল কৰিছিল।কিন্তু বিগত সময়ত নিৰুদ্দিষ্ট ছাত্রী গৰাকীক উদ্ধাৰ কৰি পৰীক্ষাত বহিব পৰাকৈ পৰিয়ালক চমজাই দিয়াত সম্পুৰ্ণৰূপে ব্যৰ্থ হ’ল বোকাখাত আৰক্ষী।
এজাহাৰত উল্লেখ কৰা অনুসৰি, বিজয় দাস নামৰ এজন যুৱকে ছাত্ৰী গৰাকীক অপহৰণ কৰিছে৷
পৰিয়ালৰ সুত্ৰই জনোৱা মতে, ছাত্রী গৰাকীক অপহৰণত সহায় কৰা এজন যুৱকক আৰক্ষীয়ে আটক কৰে যদিও পৰৱৰ্তী সময়ত এৰি দিছিল।
ছাত্রী গৰাকীৰ মাতৃৰ মতে বিজয় দাস নামৰ যুৱকজনে ছাত্ৰী গৰাকীক পূর্বেও ভাবুকি প্ৰদান কৰিছিল, যাৰ কৰাণে যুৱকজনৰ বিৰুদ্ধে পূৰ্বেও আৰক্ষী থানাত এজাহাৰ দাখিল কৰিছিল পৰিয়ালৰ লোকে।
ইফালে, যুৱক জনক বিচাৰি তেওঁৰ পিতৃক থানাত আবদ্ধ কৰাত গাঁৱৰ একাংশ লোকে ৩১ জানুৱাৰীত ছাত্ৰী গৰাকীক চমজাই দি পৰীক্ষাত বহাৰ সুবিধা কৰি দিয়াৰ কথা আছিল যদিও সেয়া হৈ নুঠিল।
উল্লেখযোগ্য যে, ছাত্ৰী গৰাকী কুৰুৱাবাহী উচ্চতৰ মাধ্যমিক বিদ্যালয়ৰ এগৰাকী মেধাবী ছাত্রী। ইংৰাজী বিষয়ত ষষ্ঠৰ পৰা দ্বাদশ শ্ৰেণীৰ ছাত্ৰ-ছাত্ৰীৰ মাজত জিলাৰ ভিতৰত সর্বোচ্চ নম্বৰ লাভ কৰাৰ বাবে পুৰস্কৃত হোৱাৰ লগতে কমলেশ্বৰ ৰাজখোৱা ফাউণ্ডেশ্যনৰ দ্বাৰাও পুৰষ্কৃত হৈছিল।
আজি উচ্চ মাধ্যমিক পৰীক্ষাৰ দিনা অন্যান্য অভিভাৱক সকলে নিজৰ পুত্ৰ-কন্যাক পৰীক্ষা গৃহলৈ লৈ যোৱাৰ বিপৰীতে নিৰুদ্দিষ্ট ছাত্ৰী গৰাকীৰ মাতৃয়ে বোকাখাত থানালৈ যাবলগীয়া হয়৷
