অসম চৰকাৰৰ বনবিভাগে ২০০৫ বৰ্ষতে আৰম্ভ কৰা ইণ্ডিয়ান ৰাইনো ভিশ্যন ২০২০ অভিলাষী আঁচনিৰ জৰিয়তে ব্ৰহ্মপুত্ৰ উপত্যকাৰ গঁড়ৰ আৱাস ভূমিত ভাৰতীয় গঁড়ৰ সংখ্যা ৩০০০ কৰা সিদ্ধান্ত গ্ৰহণ কৰিছিল।
ব্ৰহ্মপুত্ৰ উপত্যকাত গঁড়ৰ কেতবোৰ আৱাস আৰু গঁড়ৰ সংখ্যা সুৰক্ষিত কৰাও আছিল এই আঁচনিৰ আন এক উদ্দেশ্য।
এই উদ্দেশ্যৰে ইণ্ডিয়ান ৰাইনো ভিশ্যন ২০২০ ৰ অধীনত অহা ২২ ফেব্ৰুৱাৰিত কাজিৰঙাৰ পৰা মানাহ ৰাষ্ট্ৰীয় উদ্যানলৈ দুটা গঁড় স্থানান্তৰণৰ পৰিকল্পনা কৰিছে বন বিভাগে।
ৱাইল্ড টু ৱাইল্ড ব্যৱস্থাপনাৰে এই দুটা গঁড় কাজিৰঙাৰ পৰা মানাহলৈ নিয়া হ’ব বুলি জানিব পৰা গৈছে ৷ এই উদ্দেশ্যৰে অহা ২১ ফেব্ৰুৱাৰিত কাজিৰঙালৈ আহিব বিশেষজ্ঞৰ এটা দল।
এই দলটোৱে কাজিৰঙাত গঁড় কৰায়ত্ব কৰাৰ বিভিন্ন দিশ পৰ্যালোচনা কৰি সেউজ সংকেত দিলে ২২ ফেব্ৰুৱাৰিত চেতনা নাশক প্ৰয়োগ কৰি দুটা গঁড় কৰায়ত্ব কৰি মানাহলৈ নিয়াৰ পৰিকল্পনা কৰিছে বন বিভাগে।
এই সমগ্ৰ পৰিকল্পনাত বিশ্ব প্ৰকৃতি নিধি , আৰণ্যক আৰু ইন্টাৰনেচনেল ৰাইনো ফাউণ্ডেচনে অসমৰ বন বিভাগক সহায় কৰিব।
উল্লেখ্য যে আই আৰ ভি ২০২০ আঁচনিৰ বাবে কেন্দ্রীয় বন মন্ত্র্যালয়ৰ পৰা মুঠ ২০ টা গঁড় মানাহ ৰাষ্ট্রীয় উদ্যানলৈ স্থানান্তৰ কৰাৰ অনুমতি লাভ কৰিছিল। ইতিমধ্যে বিগত সময়ছোৱাত ১৮ টা গঁড় কাজিৰঙা আৰু পবিতৰাৰ পৰা মানহলৈ স্থানান্তৰ কৰা হৈছে।
ইয়াৰে ১০ টা গঁড় পবিতৰা বন্যপ্রাণী অভয়াৰণ্য আৰু ৮ টা গঁড় কাজিৰঙা ৰাষ্ট্ৰীয় উদ্যানৰ পৰা আৰু কাজিৰঙাৰ পাণবাৰীত থকা বন্য প্রাণী পুনৰ সংস্থাপন আৰু সংৰক্ষণ কেন্দ্ৰৰ পৰা ১৭ টা মুঠ ৩৫ টা গঁড় মানাহ ৰাষ্ট্ৰীয় উদ্যানলৈ স্থানান্তৰ কৰা হৈছিল।
শেষতীয়াকৈ ২০১২ চনত কাজিৰঙাৰ পৰা দুটা গঁড় মানাহলৈ নিয়াৰ পাছত সম্প্ৰতি পুনৰ দুটা গঁড় মানাহ নিয়াৰ পৰিকল্পনা কৰিছে বন বিভাগে।
মানাহ ৰাষ্ট্ৰীয় উদ্যানত বৰ্তমান গঁড়ৰ সংখ্যা বৃদ্ধি হৈ ৪১ টা হৈছেগৈ। বিগত সময়ছোৱাত মানাহ ৰাষ্ট্ৰীয় উদ্যানত গঁড়ে ২৫ টা পােৱালীৰ জন্ম দিছে।
ইয়াৰ পাছত সকলো ঠিকে থাকিলে ২২ কাজিৰঙাৰ বাগৰিৰ পৰা আৰু দুটা গঁড় মানাহ ৰাষ্ট্ৰীয় উদ্যানলৈ নিয়া হ’ব।
২০২০ বৰ্ষত ব্ৰহ্মপুত্ৰ উপত্যকাত গঁড়ৰ সংখ্যা ৩০০০ কৰাৰ লগতে কাজিৰঙাৰ উপৰি গঁড়ৰ বাবে আৰু কেতবোৰ সুৰক্ষিত আৱাসৰ লগতে এক সুস্থ জনসংখ্যা গঢ়ি তোলাই হ’ল বন বিভাগৰ প্ৰধান লক্ষ্য।
