এই বছৰৰ বিশ্ব বন্ধ্যাকৰণ দিৱস উপলক্ষে গুৱাহাটীস্থিত পশুকল্যাণকাৰী সামাজিক কল্যাণ সংস্থা জে বি এফ-এ মঙলবাৰে এক সজাগতামূলক কাৰ্য্যসূচীৰ আয়োজন কৰে।
কাৰ্য্যসূচীটোৰ অংশৰূপে জে বি এফ চেণ্টাৰ, পাঞ্জাবাৰী, গুৱাহাটীত বাট/ সমূহীয়া কুকুৰৰ এ বি চি-এ আৰ ভি (পশু জন্মনিয়ন্ত্ৰণকাৰী আৰু জলাতংকৰোধী প্ৰতিষেধক) প্ৰদানৰ নিয়মীয়া কাৰ্য্যকলাপো আছিল আৰু দৰ্শনাৰ্থীসকলক কেন্দ্ৰলৈ আহিবলৈ আৰু পুৱা ১১ বজাৰ পৰা বিয়লি ৩ বজালৈকে নিজ চকুৰে ব্যৱহাৰিক কামসমূহ চাবলৈ আদৰণি জনোৱাও হৈছিল।
একেদৰে, বন্ধ্যা/ খাচিকৰণ সন্দৰ্ভত প্ৰচাৰ আৰু জনসজাগতা সৃষ্টিৰ বাবে জে বি এফ-এ বিভিন্ন চ’চিয়েল মিডিয়া প্লেটফৰ্মত চ’চিয়েল মিডিয়া কেম্পেইনো চলাইছিল।
তাৰোপৰি, বিশ্ব বন্ধ্যাকৰণ দিৱস উপলক্ষে জে বি এফ সদস্যসকলে গুৱাহাটীৰ বিভিন্ন স্থানত তথ্যসমৃদ্ধ প্ৰচাৰপত্ৰিকাও বিতৰণ কৰিছিল।
ইয়াৰ লগতে জে বি এফ-এ গুৱাহাটীৰ পোহনীয়া জন্তুৰ গৰাকীসকলক তিনি মাহৰ বৈধতা থকা কুপন যোগানৰ এক উদ্যোগো গ্ৰহণ কৰিছিল। ইয়াৰ জৰিয়তে লোকসকলে হিয়াজ (পোহনীয়া জন্তুৰ ক্লিনিক আৰু অস্ত্ৰোপচাৰ কেন্দ্ৰ)ৰ সমৰ্থনত তেওঁলোকৰ মেকুৰী/ কুকুৰৰ বিনামূলীয়া বন্ধ্যা/ খাচিকৰণ কৰোৱাব পাৰিব।
তাৰোপৰি সজাগতা সৃষ্টিৰ উদ্দেশ্যে জে বি এফ সদস্যসকলে গুৱাহাটীৰ ক্লিনিক আৰু পেট শ্বপসমূহত তথ্যদায়ী ষ্টিকাৰ লগাইছিল।
“বিশ্ব বন্ধ্যাকৰণ দিৱস কেৱল ব্যতিক্ৰম হোৱাৰে নহয়, বৰং নিৰ্বীজকৰণ (বন্ধ্যা/ খাচি কৰণ)ৰ গুৰুত্ব আৰু উপকাৰিতাৰ বিষয়ে পোহনীয়া জন্তুৰ অভিভাৱক আৰু যতন লওঁতাসকলক শিক্ষিত কৰি তোলাৰো এক ডাঙৰ সুযোগ,” জে বি এফৰ বিবৃতিত প্ৰকাশ।
“ই পোহনীয়া জন্তুৰ অধিক সংখ্যাবৃদ্ধি নিয়ন্ত্ৰণ আৰু আমাৰ অঞ্চলসমূহত ঘৰহীন আৰু মৃত্যুমুখলৈ ঠেলা জন্তুৰ সংখ্যা কমোৱাৰ ক্ষেত্ৰত সহায়ক এক একক প্ৰচেষ্টাত বিশ্বৰ প্ৰতিজনকে একগোট কৰা এক উপলক্ষ। এনে এক মহান কিবা এটা, বিশ্বজুৰি উদযাপিত কিবা এটাৰ অংশ হোৱাটো বিস্ময়কৰ।”
জে বি এফ-এ সকলোকে শুভাকাংক্ষীৰূপে সমৰ্থন যোগোৱাৰ লগতে এই মহান উদ্দেশ্যৰ অংশ হ’বলৈ অনুৰোধ জনাইছে।
