পুনৰ বাংলাদেশত সংখ্যালঘু যুৱকক জ্বলাই হত্যা কৰাৰ অভিযোগ উঠিছে। এইবাৰ এই ঘটনা সংঘটিত হৈছে নাৰ্চিংডিত। অভিযোগ অনুসৰি শুকুৰবাৰে (২৩ জানুৱাৰী) গভীৰ নিশা চঞ্চল চন্দ্ৰ ভৌমিক (২৩) নামৰ এজন যুৱকক দুষ্কৃতিকাৰীয়ে জীৱন্তে জ্বলাই হত্যা কৰে।
চঞ্চল পুলিচ লাইনছ এলেকাৰ খানাবাৰী মছজিদ মাৰ্কেটৰ এখন গাড়ী ৱৰ্কশ্বৰ কৰ্মচাৰী আছিল। ৱৰ্কশ্বপৰ ভিতৰত শুই থকা অৱস্থাতে অগ্নিদগ্ধ হৈ মৃত্যু হয়।
আৰক্ষী সূত্ৰৰ পৰা জানিব পৰা মতে, আন দিনৰ দৰে শুকুৰবাৰে নিশা কাম শেষ কৰি গাড়ী মেৰামতিৰ দোকানৰ ভিতৰতে টোপনি গৈছিল চাঞ্চল। গভীৰ নিশা দুস্কৃতিকাৰীয়ে দোকানৰ চাটাৰত জুই লগাই দিয়ে। দোকানৰ ভিতৰত একাধিক জ্বলনশীল সামগ্ৰী থকাৰ বাবে জুই দ্ৰুতগতিত বিয়পি পৰে। সমগ্ৰ দোকানখন জ্বলি ছাই হৈ পৰে। তাতেই অগ্নিদগ্ধ হৈ মৃত্যু হয় চাঞ্চলৰ।
চাঞ্চলৰ ঘৰ কুমিল্লাৰ বাৰুৰা উপজিলাৰ লক্ষ্মীপুৰ গাঁৱত। তেওঁ পৰিয়ালটোৰ একমাত্ৰ জীৱিকা আছিল বুলি জনা যায়। তেওঁৰ পৰিয়ালৰ অভিযোগ যে এয়া কোনো বিচ্ছিন্ন ঘটনা নহয়। পৰিকল্পিতভাৱে তেওঁক হত্যা কৰা হৈছে। কিয় তেওঁক দুস্কৃতিকাৰীয়ে লক্ষ্য কৰি লৈছিল সেয়া এতিয়াও স্পষ্ট হোৱা নাই।
এই ঘটনাৰ এটা ভিডিঅ’ ভাইৰেল হৈছে ছ’চিয়েল মিডিয়াত। আকৌ এবাৰ বাংলাদেশত মহম্মদ ইউনুছৰ নেতৃত্বত চলি থকা অন্তৱৰ্তীকালীন চৰকাৰখনৰ ভূমিকাক লৈ প্ৰশ্ন উত্থাপন হৈছে।
শনিবাৰে সংবাদ মাধ্যমৰ আগত নাৰ্চিংডি সদৰ মডেল থানাৰ অ’চি এ আৰ এম আল মামুনে সংবাদ মাধ্যমৰ আগত কয় যে তেওঁলোকে ঘটনাস্থলীৰ চাৰিওফালে কেইবাটাও চিচিটিভি ফুটেজ সংগ্ৰহ কৰিছে। তাতে দোকানৰ সন্মুখত আৰু আশে-পাশে কিছুমান মানুহক দেখা গৈছে। অৱশ্যে এই ঘটনাৰ সৈতে তেওঁলোকৰ সম্পৰ্ক আছে নে নাই সেয়া নিশ্চিত কৰিব পৰা হোৱা নাই।
তেওঁ লগতে কয়, “আমি দোকানৰ মালিকৰ পৰা অভিযোগ লৈছো। আমি এই বিষয়টোৰ বিশদ তদন্ত কৰি পৰৱৰ্তী ব্যৱস্থা গ্ৰহণ কৰিম।”
উল্লেখ্য যে যোৱা বছৰৰ ১৮ ডিচেম্বৰত বাংলাদেশৰ ভালুকাত দীপু চন্দ্ৰ দাস নামৰ এজন কাৰখানাৰ শ্ৰমিকক প্ৰহাৰ কৰি হত্যা কৰাৰ অভিযোগ উত্থাপন হৈছিল। ইয়াৰ পিছত তেওঁৰ মৃতদেহটো কাৰখানাৰ পৰা কিছু দূৰৈত গছত ওলোমাই জ্বলাই দিয়া হয়।
