মাত্ৰ এটা বীয়েৰ পান কৰি ৪ লাখ ৭৪ হাজাৰ টকাৰ জৰিমনা ভৰিব লগা হৈছে ৭৯ বছৰীয়া এগৰাকী বৃদ্ধই।
এই অভাৱনীয় তথা আমোদজনক ঘটনাটো ঘটিছে গ্ৰেইট ব্ৰিটেইনত।
ঘটনাৰ বিৱৰণীৰ মতে ব্ৰিটেইনৰ হেনৰি মাকাৰ্থি নামৰ ৭৯ বৰ্ষীয় বৃদ্ধ গৰাকীয়ে কোভিড প্ৰটোকল ভংগ কৰি বীয়েৰ পান কৰি ভৰিবলগীয়া হৈছে ৫০০০ পাউণ্ড অৰ্থাৎ ভাৰতীয় মূল্যত ৪ লাখ ৭৪ হাজাৰ টকাৰ জৰিমনা।
উল্লেখ্য যে, বিশ্বৰ সৰ্বাধিক কোভিড সংক্ৰমিত দেশসমূহৰ মাজত গ্ৰেইট ব্ৰিটেইনো আছে। দেশখনৰ চৰকাৰে কোভিড সংক্ৰমণ ৰোধৰ বাবে ল’কডাউনৰ লগতে অন্যান্য বিভিন্ন পদক্ষেপো গ্ৰহণ কৰি আহিছে।
লাহে লাহে দেশখনৰ জনজীৱনলৈ কিছু স্বাভাৱিকতা ঘূৰি অহাৰ ফলত কোভিড প্ৰটোকল শিথিলো কৰা হৈছে ব্ৰিটেইনত।
কিন্তু তাৰ মাজতো কোভিড আক্ৰান্তসকলৰ বাবে কিছুমান বিশেষ প্ৰটোকল প্ৰৱৰ্তন কৰিছে দেশখনৰ চৰকাৰে।
সেই অনুসৰি কোভিড আক্ৰান্ত লোকে নিজকে হোম আইচেলশ্যন কৰাটো বাধ্যতামূলক।
জৰিমনা ভৰিবলগীয়া হোৱা হেনৰি মাকাৰ্থিও কোভিডত আক্ৰান্ত হৈ হোম আইচ’লেটেড হৈ আছিল।
কিন্তু বীয়েৰ পানত অভ্যস্ত মাকাৰ্থিয়ে লোভ সম্বৰণ কৰিব নোৱাৰি ঘৰৰ পৰা উলাই গৈ পাবত বীয়েৰ কিনি পান কৰি আছিল।
মাকাৰ্থিয়ে বীয়েৰ পান কৰি থকা অৱস্থাতে আৰক্ষীৰ হাতত ধৰা পৰি যায়।
ইয়াৰ পিছতে তেওঁৰ বিৰুদ্ধে কোভিড প্ৰটোকল ভংগৰ অপৰাধত বিচাৰ চলোৱা হয়।
বিচাৰৰ অন্তত দেশখনৰ আদালতে হেনৰি মাকাৰ্থিক ৫০০০ পাউণ্ড জৰিমনা বিহিছে।