যোৰহাটৰ স্কেনিং চেন্টাৰত পৰীক্ষা নকৰাকৈ কৰিমগঞ্জৰ পৰা ২০ জন যাত্ৰীলৈ অহা এখন বাছ শিৱসাগৰত উপস্থিত হোৱাক কেন্দ্ৰ কৰি ব্যাপক প্ৰতিক্ৰিয়াৰ সৃষ্টি হৈছে।
জানিব পৰা মতে আজি সন্ধিয়া এ এচ ১০ চি ৪০৭৭ নম্বৰৰ বাছখন আহি শিৱসাগৰৰ অসম ৰাজ্যিক বাছ অৱস্থানত উপস্থিত হৈ যাত্ৰী নমাব বিচাৰিছিল।
বাছখনৰ নম্বৰ চাই সন্দেহ হোৱাত স্থানীয় এজন ব্যৱসায়ীয়ে কাষতে থকা আৰক্ষী জোৱানক অৱগত কৰাত বাছখন কৰিমগঞ্জৰ পৰা অহা বুলি জানিব পাৰি যাত্ৰীসকলক নমাত বাধা দিয়ে আৰু প্ৰশাসনক অৱগত কৰে।
বাছখনৰ চালকৰ ভাষ্য মতে বাছখনত ২০ জন যাত্ৰী আছে আৰু বাছখন শনিবাৰে দিনৰ ২ বজাত কৰিমগঞ্জৰ পৰা শিৱসাগৰ অভিমুখে আহিছিল।
যাত্ৰাৰ পথত নগাঁও পাৰহৈ কোনো এক স্থানত আহাৰ গ্ৰহণ কৰিছিল বুলি জানিবলৈ দিয়ে চালকগৰাকীয়ে।
পৰৱৰ্তী সময়ত ২ যাত্ৰী মৰিয়নীত নমাবৰ বাবে মৰিয়নী থানাত ৰখাইছিল যদিও মৰিয়নী থানাই মৰিয়নীত কোনো যাত্ৰী নামিবলৈ নিদি পোনে পোনে শিৱসাগৰলৈ যাবলৈ কয়।
আনহাতে বাছখন যোৰহাটত থকা উজনি অসমৰ স্কেনিং চেন্টাৰত যাত্ৰীসকলৰ স্কেনিং নকৰি পোনে পোনে শিৱসাগৰলৈ লৈ আনে চালকজনে।
ইফালে লগে লগে ঘটনাস্থলত শিৱসাগৰ জিলা প্ৰশাসন, আৰক্ষী আৰু স্বাস্থ্যকৰ্মীৰ দল উপস্থিত হৈ যাত্ৰীসকলক স্কেনিং কৰিবলৈ শিৱসাগৰ জিলা প্ৰশাসনে নিৰাপত্তাৰক্ষী দি বাছখন শিৱসাগৰৰ পৰা পুনৰ যোৰহাটলৈ পঠাই দিয়ে।
ইপিনে বহুসময় ধৰি বাছখন শিৱসাগৰ এ এছ টি ছিৰ সমীপত ৰৈ থকা স্থানত শিৱসাগৰ জিলা প্ৰশাসনে সম্পূৰ্ণ ৰূপে চেনিটাইজ কৰে।
