মহাৰাষ্ট্ৰৰ এখন বনাঞ্চলত আধামৰা অৱস্থাত উদ্ধাৰ হৈছে এগৰাকী বিদেশী মহিলা। হাত ভৰি শিকলিৰে বান্ধি থোৱা অৱস্থাত উদ্ধাৰ হৈছে মৃত্যুমুখী মহিলাগৰাকীক।
অনুমান অনুসৰি মহিলাগৰাকীৰ বয়স প্ৰায় ৫০ বছৰ।
খবৰ অনুসিৰ মহাৰাষ্ট্ৰৰ সিন্ধুদুৰ্গ জিলাৰ সোণুৰলী গাঁৱৰ সমীপৰ অৰণ্যৰ মাজত এজন স্থানীয় কৃষকে মহিলাগৰাকীক এনে অৱস্থাত উদ্ধাৰ কৰে। প্ৰথমে কৃষকগৰাকীয়ে মহিলাগৰাকীক মৃত বুলি ভাবিছিল যদিও কিছুপৰ পিছত মহিলাগৰাকীৰ মুখৰ পৰা অফুট স্বৰত শব্দ শুনি জীৱিত বুলি নিশ্চিত হয়।
আৰক্ষীয়ে জনোৱা মতে, উদ্ধাৰ হোৱা মহিলাগৰাকী আমেৰিকাৰ বাসিন্দা। মহিলাগৰাকীৰ পৰা আমেৰিকাৰ পাছপ’ৰ্টৰ জেৰক্স কপি লাভ কৰিছে আৰক্ষীয়ে। লগতে তামিলনাডুত মহিলাগৰাকীৰ আধাৰ কাৰ্ড আৰু ঠিকনাও উদ্ধাৰ কৰিছে আৰক্ষীয়ে।
স্থানীয় কৃষকগৰাকীৰ সহযোগত আৰক্ষীয়ে মহিলাগৰাকীক উদ্ধাৰ কৰি স্থানীয় চিকিৎসালয়ত ভৰ্তি কৰিছিল যদিও পিছত উন্নত চিকিৎসাৰ বাবে মহিলাগৰাকীক গোৱাৰ এখন চিকিৎসালয়লৈ লৈ যোৱা হয়।
আৰক্ষীয়ে জানিব পৰা মতে মহিলাগৰাকীৰ নাম ললিতা কাই। ললিতাৰ ভিছাৰ ম্যাদ ইতিমধ্যে উকলি গৈছে।
অৱশ্যে ইতিমধ্যে তামিলনাডুত পোৱা মহিলাগৰাকীৰ ঠিকনালৈ আৰক্ষীয়ে বিশেষ দল প্ৰেৰণ কৰিছে। অনুমান কৰা হৈছে যে মহিলাগৰাকীৰ পৰিচয় সম্পৰ্কে অধিক তথ্য তাৰ পৰাই জানিব পৰা যাব।
আৰক্ষীৰ তথ্য অনুসৰি বিগত ১০ বছৰ ধৰি ললিতা কাই ভাৰতত আছে। কিন্তু কোনে কিয় মহিলাগৰাকীক এই অৱস্থা কৰি জংঘলত এৰি থৈ গ’ল সেই সম্পৰ্কে আৰক্ষীয়ে এতিয়াই জানিব পৰা নাই।
অসুস্থ অৱস্থাত থকাৰ বাবে মহিলাগৰাকীৰ পৰা এতিয়াও কোনো বিবৃতি লোৱা নাই আৰক্ষীয়ে। তাৰোপৰি অৰণ্যত মহিলাগৰাকী এনে অৱস্থাত কিমান দিন আছিল সেয়া এতিয়াও স্পষ্ট হোৱা নাই। পৰৱৰ্তী সময়ত মহিলাগৰাকীৰ ভাষ্যৰ পৰাহে এই ঘটনাৰ সবিশেষ জানিব পৰা যাব বুলি সদৰী কৰিছে মহাৰাষ্ট্ৰৰ আৰক্ষীয়ে।
