কালি বিয়লি ভাৰতৰ গুজৰাটৰ আহমেদাবাদত ২৪২ জন যাত্ৰী আৰু দুটি শিশুসহ ১২ জন ক্ৰু মেম্বাৰ কঢ়িয়াই যুক্তৰাজ্যৰ লণ্ডন অভিমুখে যোৱা দুৰ্ঘটনাগ্ৰস্ত হোৱা এয়াৰ ইণ্ডিয়াৰ বিমানখন আছিল ব’য়িং ৭৮৭ মডেল। এই মডেলৰ এখন বিমান এনেদৰে প্ৰথমবাৰৰ বাবে দুৰ্ঘটনাগ্ৰস্ত হৈছে। অৱশ্যে কোম্পানীটোৰ এগৰাকী প্ৰাক্তন অভিযন্তাই পূৰ্বে বয়িং ৭৮৭ ড্ৰিমলাইনাৰ ছিৰিজৰ সকলো বিমানক লৈ উদ্বেগ প্ৰকাশ কৰিছিল।
যোৱা বছৰৰ এপ্ৰিল মাহত তেওঁ দাবী কৰিছিল যে বয়িং ৭৮৭ ড্ৰিমলাইনাৰ ছিৰিজৰ সকলো বিমানতে গুৰুতৰ যান্ত্ৰিক বিসংগতি আছে। সেই ছিৰিজৰ সকলো বিমানৰে ত্ৰুটি বোৰ শুধৰাবলৈও তেওঁ পৰামৰ্শ দিছিল।
ব’য়িঙৰ প্ৰাক্তন গুণগত অভিযন্তা ছেম ছালেহপুৰে যোৱা বছৰৰ এপ্ৰিল মাহত এনবিচিৰ সৈতে হোৱা এক সাক্ষাৎকাৰত ব’য়িংক এই সমস্যা সমাধান কৰিবলৈ পৰামৰ্শ দিছিল।
সাক্ষাৎকাৰত ছেম ছালেহপুৰে কয় যে খৰচ কমোৱাৰ বাবে কোম্পানীটোৱে বয়িং ৭৮৭ ড্ৰিমলাইনাৰ ছিৰিজৰ বিমান নিৰ্মাণৰ বাবে গ্ৰহণ কৰা প্ৰযুক্তিটো ত্ৰুটিপূৰ্ণ। ছিৰিজ বিমানখনৰ অংশ বা ফিউজেজবোৰ সঠিকভাৱে সোমোৱাই দিয়া হোৱা নাছিল; প্ৰতিটো ফিউজেজ জইণ্টৰ মাজত এটা সৰু ফাঁক থাকে।
বয়িঙৰ প্ৰাক্তন বিষয়াগৰাকীয়ে এনবিচিক জনোৱা মতে, “বিমানখন স্বাভাৱিক গতিৰে চলালে এই দোষৰ ফলত কোনো সমস্যাৰ সৃষ্টি নহ‘লহেঁতেন; কিন্তু গতি বৃদ্ধি কৰিলে ফিউজেজৰ জইণ্টসমূহে বায়ুৰ চাপ আৰু বিমানখনৰ ইঞ্জিনৰ লগত খাপ খুৱাব নোৱাৰিব, আৰু ইয়াৰ পৰিণতি গুৰুতৰ হ‘ব। আনকি এনে পৰিস্থিতিত বিমানখন আকাশৰ মাজভাগত দুৰ্ঘটনাগ্ৰস্ত হোৱাৰ আশংকাও আছে। বয়িং ৭৮৭ ড্ৰিমলাইনাৰ ছিৰিজৰ বিমান বৰ্তমান বিশ্বজুৰি চলি থকা বিমানসমূহ পৰিদৰ্শন কৰিব লাগে আৰু দোষসমূহ জৰুৰী ভিত্তিত সমাধান কৰিব লাগে।”
ড্ৰিমলাইনাৰ ছিৰিজৰ বিমানৰ ফিউজেজ জইণ্টত কেনেধৰণৰ দোষ আছে বুলি সোধাত ছেম ছালেহপুৰে কয় যে বিমানখনৰ ফিউজেজৰ জইণ্টত থকা ফাঁকবোৰ পূৰণ কৰিবলৈ সৰু সৰু ধাতুৰ টুকুৰা ব্যৱহাৰ কৰা হয়। এই টুকুৰাবোৰক সাধাৰণতে ‘শ্বিম’ বুলি কোৱা হয়। ড্ৰিমলাইনাৰ ছিৰিজৰ বিমান নিৰ্মাণত প্ৰয়োজনীয় পৰিমাণে শ্বিমৰ ব্যৱহাৰ কৰা হোৱা নাছিল।
যদিও সৰু যেন লাগিব পাৰে, তথাপিও এইটো এটা অতি গুৰুতৰ ভুল। কাৰণ প্ৰয়োজনীয় সংখ্যক শ্বিমৰ অভাৱত বিমানখনৰ কামৰ সময়ত বিমানখনৰ ফিউজেজত অত্যধিক চাপ পৰে, যাৰ ফলত দুৰ্ঘটনাৰ সম্ভাৱনা বৃদ্ধি পায় আৰু লগতে বিমানখনৰ আয়ুসো হ্ৰাস পায়।
এনবিচিত ছেম ছালেহপুৰৰ সাক্ষাৎকাৰ প্ৰচাৰ হোৱাৰ কিছু ঘণ্টাৰ ভিতৰতে বয়িঙে এক বিবৃতি প্ৰকাশ কৰে। বিবৃতিটোত কোৱা হৈছে যে বয়িং হৈছে এক অতি পেছাদাৰী সংস্থা আৰু কোম্পানীটোৱে ৭৮৭ ড্ৰিমলাইনাৰ ছিৰিজৰ বিমানখনৰ সুৰক্ষা আৰু মসৃণ উৰণৰ প্ৰদৰ্শনৰ ওপৰত সম্পূৰ্ণ আত্মবিশ্বাসী।
উল্লেখ্য যে, আহমেদাবাদত সংঘটিত দুৰ্ঘটনাৰ কাৰণ এতিয়াও জানিব পৰা হোৱা নাই।
আহমেদাবাদত বিমানখন কিহৰ বাবে দুৰ্ঘটনাগ্ৰস্ত হয় সেয়া এতিয়াও জানিব পৰা হোৱা নাই।
