গোৱালপাৰা জিলাৰ কৃষ্ণাইৰ সমীপৰ টুকুৰা অঞ্চলত আজি এটা মহিলাৰ দলে অঞ্চলটোত গঢ়ি উঠা অবৈধ চুলাই মদৰ ব্যৱসায় প্ৰতিষ্ঠানৰ বিৰুদ্ধে অভিযান চলাই কেইবাটাও সুৰাৰ ঘাটি উৎখাত কৰে।
স্থানীয় লোকে মদৰ ঘাটি সমূহ উচ্ছেদ কৰাৰ বাবে প্ৰশাসনক বাৰম্বাৰ অনুৰোধ জনাই আহিছিল যদিও কোনো ব্যৱস্থা গ্ৰহণ নকৰাৰ বাবেই স্থানীয় মহিলা সকলে আজি এইদৰে চুলাই মদৰ বিৰুদ্ধে এই অভিযান চলোৱা বুলি জনায়।
উত্তেজিত মহিলাসকলে অঞ্চলটোৰ প্ৰায়বোৰ সুৰাৰ ঘাটি উচ্ছেদ কৰাৰ লগতে কেইবা হাজাৰ লিটাৰ চুলাই নষ্ট কৰে। ইফালে মহিলাসকলৰ এই ৰূপ দেখি পলাই পত্ৰং দিয়ে সুৰাৰ ব্যৱসায়ীসকল।
মহিলাৰ দলটোৱে চলোৱা এই অভিযানৰ খবৰ লাভ কৰাৰ লগে লগে স্থানীয় আৰক্ষীৰ দল ঘটনাস্থলত উপস্থিত হৈ উচ্ছেদ অভিযান বন্ধ কৰিবলৈ অনুৰোধ কৰে। কিন্তু আৰক্ষীৰ নিৰ্দেশক গুৰুত্ব প্ৰদান নকৰি মহিলা সকলে উচ্ছেদ অভিযান অব্যাহত ৰাখে। অৱশেষত উপায়বিহীন হৈ আৰক্ষীৰ দলেও মহিলাসকলৰ সৈতে ঘাটি উচ্ছেদ কৰাত ব্ৰতী হয়।
উল্লেখ্য যে, ঐতিহ্যমণ্ডিত শ্ৰী শ্ৰী টুক্ৰেশ্বৰী দেৱালয়ৰ সমীপতে গঢ় লৈ উঠা এনেবোৰ অবৈধ চুলাই মদৰ ঘাটিয়ে মন্দিৰৰ লগতে অঞ্চলটোৰ পৰিৱেশ বিনষ্ট কৰি আহিছিল। যাৰ ফলত অপৰাধজনিত ঘটনাও দ্ৰুত গতিত বৃদ্ধি পাইছিল অঞ্চলটোত। সেয়ে মহিলা সকলে অবৈধ সুৰাৰ ঘাটিৰ বিৰুদ্ধে গ্ৰহণ কৰা আজিৰ এই পদক্ষেপক স্থানীয় ৰাইজে প্ৰশংসা কৰে।