ভুৱা বিত্তীয় প্ৰতিষ্ঠান খুলি লাখ লাখ টকা আত্মসাৎ কৰা লখিমপুৰ ৰেচম বিভাগৰ এজন শীৰ্ষ বিষয়াক ১৩ নৱেম্বৰত ধেমাজিত অসম আৰক্ষীৰ অৰ্থনৈতিক অপৰাধ তদন্ত সংস্থাই গ্ৰেপ্তাৰ কৰিলে যদিও প্ৰৱঞ্চিত গ্ৰাহকসকল আশ্বস্ত হ’ব পৰা নাই। তেওঁলোকৰ মূল চিন্তাটো হ’ল- এই তদন্তই তেওঁলোকৰ টকা ঘূৰাই পোৱাত সহায় কৰিব নে? নে আনবোৰ চিট ফাণ্ডৰ দৰেই কেৱল প্ৰৱঞ্চকক জেইলত ভৰাই দায় সাৰিব চৰকাৰে?
উল্লেখযোগ্য যে লখিমপুৰৰ ৰেচম বিভাগৰ সহকাৰী প্ৰৱন্ধক পৱিত্ৰ সন্দিকৈয়ে তেওঁৰ ভনীয়েক আৰু দুজন মানৰ লগ হৈ ‘অবনাৰী ফাইনেন্স প্ৰাইভেট লিমিটেড’ নামৰ এটা বিত্তীয় প্ৰতিষ্ঠান খুলি গ্ৰাহকৰ পৰা অধিক সুতৰ লোভ দেখুৱাই বৃহৎ পৰিমাণৰ ধন সংগ্ৰহ কৰিছিল।
কিন্তু বহুতো গ্ৰাহকে নিৰ্ধাৰিত সময়তো ধন ঘূৰাই নোপোৱাত প্ৰৱঞ্চিত গ্ৰাহকসকলে আৰক্ষীৰ অৰ্থনৈতিক অপৰাধ তদন্ত সংস্থাৰ ওচৰত অভিযোগ দিছিল। তাৰ ভিত্তিত তদন্ত সংস্থাটোৱে ২০/১৮ নম্বৰৰ এটা গোচৰ পঞ্জীয়ন কৰি তদন্ত আৰম্ভ কৰি ১৩ নৱেম্বৰত প্ৰৱঞ্চক সন্দিকৈ আৰু তেওঁৰ ভনীয়েকক জিণ্টী সন্দিকৈক গ্ৰেপ্তাৰ কৰে। ভুৱা বিত্তীয় প্ৰতিষ্ঠানটোৰ ব’ৰ্ড অব্ ডাইৰেক্টৰছ হিচাপে আছিল পৱিত্ৰ সন্দিকৈ, জিণ্টি সন্দিকৈ, ৰঞ্জিত কুমাৰ চন্দ।
ইপিনে আৰক্ষীয়ে তদন্ত কৰি প্ৰৱঞ্চকজনক গ্ৰেপ্তাৰ কৰিলেও চিন্তা দূৰ হোৱা নাই ভুক্তভোগী ৰাইজৰ। “প্ৰৱঞ্চক জেইলত গ’লেও ভুক্তভোগীয়ে তেওঁলোকৰ ক্ষতি হোৱা টকাৰ ঘূৰাই নাপালে এই তদন্তই বিশেষ একো সহায় কৰিব নোৱাৰিব।” এজন ভুক্তভোগী গ্ৰাহকে কয়।
“স্বাভাৱিকতে দেখা যায় সকলো ধৰণৰ চিট ফাণ্ডজাতীয় কেলেংকাৰিত ভুক্তভোগীৰ টকা কেতিয়াও ঘূৰাই পোৱাৰ ব্যৱস্থা নকৰে চৰকাৰে। প্ৰৱঞ্চক কেইদিন মান জেইলত থাকি জামিন লৈ পুনৰ স্বাভাৱিক জীৱন-যাপনলৈ ঘূৰি আহে। কিন্তু ভুক্তভোগীৰ টকা ঘূৰি নাহে।” আন এজন সচেতন ব্যক্তিয়ে কয়।
উল্লেখযোগ্য যে তদন্ত সংস্থাটোৰ সূত্ৰ মতে, প্ৰৱঞ্চক সন্দিকৈয়ে তেওঁৰ সহযোগীকেইজনৰ লগ লাগি গ্ৰাহকৰ পৰা প্ৰায় ৪০ লাখ টকা সংগ্ৰহ কৰিছিল।
ইপিনে পৱিত্ৰ সন্দিকৈৰ আন এজন সহযোগী, প্ৰৱঞ্চক ৰঞ্জিত কুমাৰ চন্দ এতিয়াও পলাতক।
