আদালতত ১৫ খন নথি দাখিল কৰাৰ পাছতো নিজকে ভাৰতীয় বুলি প্ৰমাণ কৰিব নোৱাৰিলে অসমৰ এজন ব্যক্তিয়ে। পেচাত দিনহাজিৰা কৰা এই লোকজনৰ আবেদন গুৱাহাটী উচ্চ ন্যায়ালয়ে খাৰিজ কৰি দিছে।
ন্যায়াধীশৰ বিচাৰপীঠে কয় যে লোকজনে দাখিল কৰা প্ৰমাণবোৰ আইন অনুসৰি গ্ৰহণযোগ্য নহয় অথবা নাগৰিকত্ব প্ৰমাণ কৰাৰ বাবে সেইবোৰ যথেষ্ট নাছিল।
জানিব পৰা মতে লোকজন গুৱাহাটীৰ ওচৰৰ এটা ভাড়াগৰত থাকে। নিজৰ নাগৰিকত্ব প্ৰমাণ কৰিবলৈ তেওঁ আদালতত নথি জমা দিয়াৰ লগতে মৌখিক সাক্ষ্যও প্ৰদান কৰিছিল। তেওঁ জমা দিয়া নথিপত্ৰৰ ভিতৰত আছিল ১৯৫১ চনৰ ৰাষ্ট্ৰীয় নাগৰিক পঞ্জী বা এন আৰ চিৰ প্ৰতিলিপি, য‘ত তেওঁৰ পিতৃ আৰু ককা-আইতাৰ নাম অন্তৰ্ভুক্ত আছিল। ইয়াৰ উপৰিও ১৯৬৬ চনৰ পৰা আৰম্ভ কৰি বিভিন্ন সময়ৰ ভোটাৰ তালিকাৰ প্ৰতিলিপি, ২০১৭ চনৰ এখন স্কুলৰ প্ৰমাণপত্ৰ, এখন পান কাৰ্ড আৰু ভোটাৰ পৰিচয় পত্ৰও তেওঁ আদালতত জমা দিছিল।
কেৱল সিমানেই নহয়, নিজৰ বংশ পৰিচয় প্ৰমাণ কৰিবলৈ তেওঁ পিতৃৰ মৌখিক সাক্ষ্যও আদালতত দাঙি ধৰিছিল। ইমানবোৰ প্ৰমাণ দিয়াৰ পাছতো লোকজনৰ নাগৰিকত্ব প্ৰমাণ নোহোৱাটো এটা ডাঙৰ বিষয় হৈ পৰিছে। ন্যায়ালয়ৰ মতে এই সকলোবোৰ নথি তেওঁৰ দাবী সাব্যস্ত কৰিবলৈ পৰ্যাপ্ত নাছিল, যাৰ বাবে শেষত তেওঁৰ আবেদন নাকচ কৰা হয়।
