গ্ৰাম্য কামৰূপ জিলাৰ উত্তৰ গুৱাহাটীত এগৰাকী কিশোৰীক অপহৰণ কৰি জি এন আৰ চিৰ কাষৰ এটা ভাড়াঘৰত আবদ্ধ কৰি ৰাখি বলাৎকাৰ কৰাৰ জঘন্য ঘটনা সম্প্ৰতি পোহৰলৈ আহিছে। এটা নিৰ্ভৰযোগ্য সূত্ৰৰ পৰা জানিব পৰা মতে, দশম মানৰ ছাত্ৰী এই কিশোৰীগৰাকী চৰাইদেউ জিলাৰ বৰহাট চাহ বাগানৰ বাসিন্দা।
নিৰ্যাতিতা কিশোৰীগৰাকী উত্তৰ গুৱাহাটীৰ চৰকাৰী প্ৰাথমিক স্বাস্থ্য কেন্দ্ৰত কোনোমতে গৈ উপস্থিত হোৱাৰ পাছত সমগ্ৰ ঘটনাটো পোহৰলৈ আহে। বৰ্তমানেও আতংকগ্ৰস্তা কিশোৰীগৰাকীয়ে ভালদৰে কথা ক’ব পৰা হৈ উঠা নাই।
নৰ্থ ইষ্ট নাওৰ সৈতে হোৱা এটা কথোপকথনত কামৰূপ (গ্ৰাম্য) চাইল্ডলাইনৰ সমন্বয়ক ইৰানী বড়োৱে কয়, “উত্তৰ গুৱাহাটী প্ৰাথমিক স্বাস্থ্যকেন্দ্ৰই সন্দেহ পোষণ কৰি ততাতৈয়াকৈ চাইল্ডলাইনত খবৰ দিয়ে। আমি উত্তৰ গুৱাহাটী আৰক্ষী চকীৰ এটা দলৰ সৈতে কিশোৰীগৰাকীক স্বাস্থ্যকেন্দ্ৰৰ পৰা লৈ আহোঁ।”
বড়োৱে জনাইছে যে দশম মানৰ বাছনি পৰীক্ষাত বহা কিশোৰীগৰাকীয়ে নৱেম্বৰৰ ১ তাৰিখে ঘৰৰ পৰা ওলাই আহি প্ৰথমে নামৰূপলৈ যায়। তাৰ পৰা ২ নৱেম্বৰত ৰে’লেৰে আহি গুৱাহাটী পাইছিল।
বড়োৱে কয়, ‘প্ৰাপ্ত তথ্য অনুসৰি, কিশোৰীগৰাকীয়ে গুৱাহাটী ৰে’লৱে ষ্টেশ্যনত অনাই-বনাই ঘূৰি আছিল। দেৱ বৰা নামৰ এজন লোকে তেওঁক কামাখ্যা মন্দিৰলৈ লৈ যায়। তাৰ পাছত নিৰ্যাতিতাগৰাকীৰ ভাষ্য অনুসৰি দেৱ বৰাই তেওঁক জি এন আৰ চি হস্পিটেলৰ কাষত সমীপৱৰ্তী তেওঁৰ ভাড়াঘৰলৈ লৈ গৈ তিনি দিন ধৰি যৌন নিৰ্যাতন চলায়।
ইতিমধ্যে উত্তৰ গুৱাহাটী আৰক্ষী চকীৰ ভাৰপ্ৰাপ্ত বিষয়া আৰ কে বৰাই নৰ্থ ইষ্ট নাওৰ আগত সদৰী কৰিছে যে নিৰ্যাতিতাগৰাকীয়ে অপৰাধীক চিনাক্ত কৰাব পৰা নাই আৰু তেওঁৰ বিষয়ে বিতং বিৱৰণ দিব পৰা নাই। তেওঁ আৰু কৈছে, “আমি কিশোৰীগৰাকীক জি এন আৰ চি হস্পিটেলৰ সমীপৱৰ্তী ঘৰলৈ লৈ যোৱা সত্ত্বেও তেওঁ স্থানটো চিনাক্ত কৰিব পৰা নাই।
বৰাই আৰু জনায় যে নিৰ্যাতিতাগৰাকীক গুৱাহাটীৰ ৰূপনগৰস্থিত ‘কল্যাণী নিৱাস’ নামৰ আশ্ৰয় ভৱনলৈ লৈ যোৱা হৈছে। মঙলবাৰে নিৰ্যাতিতাগৰাকীৰ স্বাস্থ্য পৰীক্ষা সম্পন্ন কৰা হ’ব। এই পৰ্যন্ত কোনো এজাহাৰ দাখিল কৰা হোৱা নাই বুলি জনায় ভাৰপ্ৰাপ্ত আৰক্ষী বিষয়া বৰাই।