অহা ১ এপ্ৰিলৰ পৰা সমগ্ৰ দেশতে কাৰ্যকৰী হ’ব আয়কৰ আইন, ২০২৫। এই গুৰুত্বপূৰ্ণ পৰিৱৰ্তনৰ বিষয়ে দেওবাৰে লোকসভাত বাজেট ভাষণ প্ৰদান কৰি কেন্দ্ৰীয় বিত্তমন্ত্ৰী নিৰ্মলা সীতাৰমণে আনুষ্ঠানিকভাৱে ঘোষণা কৰে। তেওঁ জনোৱা অনুসৰি, এই নতুন আইনখনৰ বাবে প্ৰয়োজনীয় নিয়ম আৰু আয়কৰ ৰিটাৰ্ণৰ বাবে ব্যৱহৃত প্ৰ-পত্ৰসমূহ অতি শীঘ্ৰেই চৰকাৰে জনসাধাৰণক অৱগত কৰিব। উল্লেখযোগ্য যে প্ৰায় ছয় দশক পুৰণি পুৰণি কৰ আইনখনৰ ঠাইত এতিয়াৰে পৰা এই নতুন আয়কৰ আইনখন বলবৎ কৰা হ’ব।
বিত্তমন্ত্ৰীগৰাকীয়ে সদৰী কৰা মতে, ২০২৬-২৭ চনৰ বাজেটত কৰ আইনৰ ক্ষেত্ৰত যিবোৰ নতুন পৰিৱৰ্তন কৰা হৈছে, সেই সকলোবোৰ এই নতুন আইনখনত অন্তৰ্ভুক্ত হ’ব। বিত্তমন্ত্ৰীয়ে উল্লেখ কৰে যে এই নতুন প্ৰত্যক্ষ কৰ সংহিতাটো অতি কম সময়ৰ ভিতৰতে সম্পূৰ্ণ কৰা হৈছে যাতে ১ এপ্ৰিলৰ পৰা ইয়াৰ কাৰ্যকৰীকৰণত কোনো বাধাৰ সৃষ্টি নহয়। কৰদাতাসকলৰ সুবিধাৰ বাবে আয়কৰৰ নিয়ম আৰু বিভিন্ন প্ৰ-পত্ৰসমূহ সৰল কৰা হৈছে যাতে সাধাৰণ মানুহে কোনো অসুবিধাৰ সন্মুখীন নোহোৱাকৈ সময়মতে নিজৰ কামবোৰ সম্পন্ন কৰিব পাৰে।
এই নতুন আইনখনৰ এটা বিশেষ দিশ হ’ল যে ইয়াৰ দ্বাৰা ৰাজহ সংগ্ৰহ বা কৰৰ হাৰত কোনো ধৰণৰ পৰিৱৰ্তন কৰা হোৱা নাই। ইয়াৰ পৰিৱৰ্তে কৰ সম্পৰ্কীয় আইনখন যাতে সকলোৱে সহজে বুজি পায়, তাৰ ওপৰতহে বেছি গুৰুত্ব দিয়া হৈছে। ১৯৬১ চনৰ পুৰণি আয়কৰ আইনখনৰ তুলনাত এই নতুন আইনখনত ধাৰাসমূহৰ সংখ্যা প্ৰায় ৫০ শতাংশ হ্ৰাস কৰা হৈছে। ইয়াৰ ফলত কৰ সম্পৰ্কীয় অস্পষ্টতা দূৰ হ’ব আৰু আদালতত চলি থকা গোচৰৰ সংখ্যাও বহু পৰিমাণে কমি আহিব বুলি আশা কৰা হৈছে।
আন এক গুৰুত্বপূৰ্ণ পৰিৱৰ্তন হিচাপে এই নতুন আইনখনত মূল্যায়ন বৰ্ষ আৰু পূৰ্বৰ বছৰৰ মাজত থকা পাৰ্থক্যটো আঁতৰাই পেলোৱা হৈছে। ইয়াৰ পৰিৱৰ্তে এতিয়াৰে পৰা কেৱল এটা একক কৰ বৰ্ষৰ ব্যৱস্থা থাকিব, যিয়ে সমগ্ৰ প্ৰক্ৰিয়াটো অধিক সৰল কৰি তুলিব। তদুপৰি কৰদাতাসকলৰ বাবে আন এটা সুখবৰ এয়ে যে যদি কোনোবাই নিৰ্ধাৰিত সময়সীমাৰ পাছতো আয়কৰ ৰিটাৰ্ণ দাখিল কৰে, তথাপিও তেওঁলোকে টিডিএছ ৰিফাণ্ডৰ বাবে আবেদন কৰিব পাৰিব। ইয়াৰ বাবে কোনো ধৰণৰ জৰিমনা ভৰিব নালাগিব বুলি বিত্তমন্ত্ৰী নিৰ্মলা সীতাৰমণে নিজৰ ভাষণত স্পষ্ট কৰি দিয়ে।
