বাক্সাৰ জালাহত আজি মাক আৰু বিবাহিত জীয়েকে একেলগে চিপ লৈ আত্মহত্যা কৰা ঘটনাই অঞ্চলটোত এক শোকাকুল পৰিৱেশৰ সৃষ্টি কৰিছে।
উল্লেখযোগ্য যে মাতৃ কনিকা দেৱী আৰু দেৱীৰ বিবাহিত জীয়ৰী ৰিম্পী দেৱীয়ে স্বামী শিৱা শৰণীয়াৰ ভাড়াঘৰত চিপ লৈ আত্মহত্যা কৰে।
মন কৰিব লগীয়া যে বাক্সাৰ জালাহ আৰক্ষী চকীৰ অন্তৰ্গত কাৰহানাৰ শিৱা শৰণীয়া নামৰ লোকজনে ভালপোৱা সূত্ৰে নাওশালীৰ ৰিম্পী দেৱীক তিনিমাহ পূৰ্বে পলুৱাই আনি বিবাহ কৰাইছিল।
তেনে অৱস্থাতে আজি তিনিমাহৰ পিছতে কি কাৰণত কি পৰিস্থিতিত এনেদৰে মাক আৰু জীয়েকে আত্মহত্যা কৰিব লগা হ’ল সেয়া বাতৰি লিখা পৰলৈকে জানিব পৰা হোৱা নাই। অৱশ্যে মৃতদেহৰ ওচৰত এখন চুইচাইড নোট উদ্ধাৰ হৈছে যদিও তাত আত্মহত্যাৰ কাৰণ স্পষ্টভাৱে উল্লেখ নাই।
আৰক্ষীয়ে উদ্ধাৰ কৰা চুইচাইড নোটখনত উল্লেখ আছে এনেদৰে, ‘মই তোমাক বহুত কষ্টি দিলো পাৰিলে মোক মাফ কৰি দিবা প্লিজ। তুমি সুখী হোৱা।’
আনহাতে মাতৃ কনিকা দেৱীৰ ভাতৃয়ে কয় যে তেওঁ ঘটনা সম্পৰ্কত অৱগত হোৱাত ঘটনাস্থলীত উপস্থিত হৈ ভাড়াঘৰটোৰ একেটা কোঠাতে বায়েক কনিকা আৰু ভাগিনীয়েক ৰিম্পীক চিপ লৈ থকা অৱস্থাত উদ্ধাৰ কৰে। ইফালে সেই সময়ছোৱাত তীৰ খেলৰ এজেণ্ট তথা ৰিম্পীৰ স্বামী শিৱা ঘৰত উপস্থিত নাছিল।
অৱশ্যে ঘটনাস্থলীত জালাহ আৰক্ষী উপস্থিত হৈ ঘটনা সম্পৰ্কত তদন্ত অব্যাহত ৰাখিছে আৰু তদন্তৰ অন্ততহে ঘটনাৰ প্ৰকৃত কাৰণ জানিব পৰা যাব।
