এটি ৬ বছৰীয়া শিশু এগৰাকী শিক্ষয়ত্ৰীৰ প্ৰহাৰত কৰি মৃত্যুৰ অভিযোগ উঠিছে। বিশাখাপট্টনমৰ এখন ব্যক্তিগত বিদ্যালয়ৰ এই ঘটনাই চাঞ্চল্যৰ সৃষ্টি কৰিছে। হোমৱৰ্ক নকৰাৰ বাবে এগৰাকী শিক্ষয়ত্ৰীয়ে শিশুটিক লাঠিৰে প্ৰহাৰ কৰাৰ অভিযোগ তুলিছে মৃতকৰ পৰিয়ালে। ইয়াৰ পিছত তেওঁৰ চেতনা হেৰুৱাই পেলায়। চিকিৎসালয়লৈ নিয়াৰ সময়ত চিকিৎসকে তেওঁক মৃত বুলি ঘোষণা কৰে।
শিশুটি লিটিল গাৰ্ডেন স্কুলৰ ছাত্ৰ। নাম প্ৰণয় তেজা। মৃত্যুৰ সঠিক কাৰণ জানিবলৈ মৰণোত্তৰ পৰীক্ষা কৰা হৈছে। ইফালে শিশুটিৰ মৃত্যুৰ খবৰ বিয়পি পৰাৰ লগে লগে চিকিৎসালয়খনত পৰিয়ালৰ লোক আৰু আত্মীয়ৰ সমাগম ঘটে। ঘটনাৰ বাবে দায়ীসকলৰ বিৰুদ্ধে তেওঁলোকে কঠোৰ ব্যৱস্থা গ্ৰহণৰ দাবী জনায়।
পৰিয়ালৰ দাবী, বৃহস্পতিবাৰে পুৱা সম্পূৰ্ণ সুস্থ অৱস্থাত প্ৰণয় বিদ্যালয়লৈ গৈছিল। ৰাতিপুৱা সাৰ পোৱাৰ লগে লগে তেওঁ স্কুললৈ যাবলৈ লৰঢপৰা কৰিছিল।
প্ৰণয়ৰ দেউতাকৰ মতে, ‘মোৰ ল’ৰাটোৱে ৰাতিপুৱা প্ৰায় ৮ বজাত সাৰ পাই ক’লে যে মই স্কুললৈ যাব বিচাৰো।’ সি স্কুললৈ যাবলৈ জোৰ দি আছিল। প্ৰথমতে আমি তেওঁক পঠিয়াব বিচৰা নাছিলো। পিছত ভাবিলো যাওক। কাৰণ, পৰীক্ষাবোৰ আহি আছিল। তাৰ পিছত সি স্কুললৈ গ’ল।’
ইফালে স্কুললৈ যোৱাৰ কেইঘণ্টামান পিছতে মৃতকৰ পৰিয়াললৈ ফোন আহে। পৰিয়ালৰ দাবী, বিদ্যালয়খনে এই ফোন কৰা নাছিল। শিশুটিৰ দেউতাকে কয় যে দুপৰীয়াৰ ভাগত তেওঁ ফোনযোগে গম পাইছিল যে তেওঁৰ পুত্ৰৰ কিবা এটা হৈছে। তেওঁৰ ভাষাত, ‘স্কুলৰ কোনোৱে মোক ফোন কৰা নাছিল। মোৰ খুলশালীৰ ঘৰৰ ওচৰত কাম কৰা স্থানীয় ৰান্ধনী কেইজনমানে মোক ফোন কৰি এই বিষয়ে অৱগত কৰিলে।’
ইয়াৰ পিছতে শিশুটিক স্থানীয় চিকিৎসালয়ত ভৰ্তি কৰোৱা হয়। অৱশ্যে চিকিৎসকে তেওঁক মৃত ঘোষণা কৰে। পৰিয়ালৰ দাবী, চিকিৎসালয়ত উপস্থিত হোৱাৰ প্ৰায় আধা ঘণ্টা পূৰ্বেই শিশুটিৰ মৃত্যু হোৱা বুলি চিকিৎসালয়খনে জনাইছিল।
ইয়াৰ পিছতে শিশুটিৰ পিতৃ-মাতৃয়ে ঘটনা সন্দৰ্ভত সোধা-পোছা কৰিবলৈ বিদ্যালয়লৈ গৈ চিচিটিভিৰ ফুটেজ চায়। শিশুটিৰ পিতৃয়ে অভিযোগ কৰে যে ফুটেজত শিক্ষয়ত্ৰীগৰাকীয়ে শিশুটিক লাঠিৰে প্ৰহাৰ কৰা দেখা গৈছে। তেওঁৰ ভাষাত, ‘বিদ্যালয়খনৰ চিচিটিভি ফুটেজ চাই থাকোঁতে দেখা গ’ল যে শিক্ষয়ত্ৰীগৰাকীয়ে তেওঁক ভয় দেখুৱাইছে। তেওঁ তাক লাঠিৰে কোবাইছে। ভয় আৰু আতংকত তেওঁ চেতনা হেৰুৱাই তাতেই শিক্ষকৰ কোলাত ঢলি পৰিল।’
ইতিমধ্যে আৰক্ষীয়ে এফআইআৰ দাখিল কৰি তদন্ত আৰম্ভ কৰিছে। শিশুটিৰ মৃতদেহ মৰণোত্তৰ পৰীক্ষাৰ বাবে প্ৰেৰণ কৰা হৈছে। মৰণোত্তৰ পৰীক্ষাৰ প্ৰতিবেদন পোৱাৰ পিছতহে মৃত্যুৰ সঠিক কাৰণ স্পষ্ট হ’ব।
