খাদ্যৰ বাবে এফ চি আইৰ গুদামত প্ৰৱেশ কৰি কীটনাশকৰ গোন্ধৰ বাবে ১৪৫টা বান্দৰৰ মৃত্যু হয়। পোন্ধৰ দিন পূৰ্বে উত্তৰ প্ৰদেশৰ হাথৰছত সংঘটিত হৈছিল এই কৰুণ ঘটনা। মৃত বান্দৰকেইটা কলোৱাৰী পথৰ এফ চি আই গুদামৰ চৌহদত সমাধিস্থ কৰে। শুকুৰবাৰে আৰক্ষীয়ে মৃতদেহ খনন কৰি মৰণোত্তৰ পৰীক্ষাৰ বাবে প্ৰেৰণ কৰে। হাথৰাছৰ কোটোৱালী থানাৰ আৰক্ষীয়ে একাংশ অচিনাক্ত ব্যক্তিৰ বিৰুদ্ধে গোচৰ ৰুজু কৰিছে।
সূত্ৰ অনুসৰি সেই গুদামত বৃহৎ পৰিমাণৰ ঘেঁহু মজুত আছিল। খাদ্যৰ গোন্ধত বান্দৰৰ জাকে তাত জপিয়াই পৰে। গুদামৰ এখন খিৰিকী ভঙা আছিল। ভঙা খিৰিকীখনেৰে সিঁহত ভিতৰত সোমায়। গুদামত মজুত ঘেঁহুৰ ওপৰত পোক-পৰুৱাৰ আক্ৰমণ ৰোধ কৰিবলৈ ঘেঁহুৰ বস্তাত কীটনাশক এলুমিনিয়াম ফছফাইড স্প্ৰে কৰা হৈছিল। সেই কীটনাশকৰ গোন্ধত জাকটোৰ ১৪৫টা বান্দৰৰ মৃত্যু হয়। সেই কীটনাশক অতি বিষাক্ত।
হৰ্ষিত গৌৰ নামৰ এজন স্থানীয় বাসিন্দাই এই ঘটনাৰ খবৰ দিয়ে কোটৱালী থানাত। তেওঁ আৰক্ষীক জনোৱা মতে, ১৯ নৱেম্বৰত এফ চি আইৰ গুদামৰ এজন কৰ্মচাৰীয়ে তেওঁক জনাইছিল যে যোৱা ৭ নৱেম্বৰত ভঙা খিৰিকীৰে এটা বান্দৰৰ দলে গুদামটোত প্ৰৱেশ কৰিছিল। কিন্তু সিঁহত কেতিয়াও বাহিৰলৈ ওলাই যোৱা দেখা পোৱা নগ’ল।
মৃত বান্দৰবোৰ গাঁত খান্দি গুদামৰ চৌহদত পুতি থোৱাৰ কথাও হৰ্ষিতক অৱগত কৰা হয়। খবৰটো শুনি পিছদিনা হৰ্ষিতে কোটৱালী থানাত এজাহাৰ দাখিল কৰে। লগতে হাথৰাছৰ মহকুমাধিপতি আৰু সদৰ চক্ৰ পৰিদৰ্শকক অভিযোগ দাখিল কৰে।
শুকুৰবাৰে আৰক্ষীয়ে কবৰ খনন কৰি মৃতদেহবোৰ মৰণোত্তৰ পৰীক্ষাৰ বাবে প্ৰেৰণ কৰে। প্ৰাথমিক তদন্তৰ অন্তত আৰু এফ চি আইৰ কৰ্মচাৰীৰ এটা অংশক জেৰা কৰাৰ পিছত আৰক্ষীয়ে জানিব পাৰে যে যোৱা ৭ নৱেম্বৰত গুদামত মজুত ঘেঁহুৰ বস্তাত কীটনাশক স্প্ৰে কৰা হৈছিল। সেই নিশাই গুদামটোত বান্দৰৰ জাকটো সোমাইছিল।
গুদাম কৰ্তৃপক্ষই বিষয়টো সম্পূৰ্ণৰূপে লুকুৱাই ৰখাৰ অভিযোগ উত্থাপন কৰে হৰ্ষিতে। তাত থকা শ্ৰমিকসকলকো এই বিষয়ে মুখ খোলাত নিষেধাজ্ঞা আৰোপ কৰা হৈছিল। আৰক্ষীৰ মতে, ঘটনাৰ তদন্ত আৰম্ভ হৈছে যদিও এতিয়ালৈকে কোনো লোকক গ্ৰেপ্তাৰ কৰা হোৱা নাই। অৱশ্যে আৰক্ষীৰ এক সূত্ৰৰ মতে, এফ চি আই কৰ্তৃপক্ষইও এই ঘটনাৰ তদন্ত আৰম্ভ কৰিছে।
হাথৰাছৰ সেই গুদামত ১৭ হাজাৰ মেট্ৰিক টন খাদ্য শস্য মজুত কৰিব পাৰি। বৰ্তমান ১২ হাজাৰ মেট্ৰিক টন ঘেঁহু তাত মজুত হৈ আছে। সেই গুদামৰ পৰাই হাথৰাছৰ বিভিন্ন ৰেচনৰ দোকানলৈ খাদ্য শস্য যোগান ধৰা হয়।
