যি সময়ত কৰোনাৰ বাবে ঘৰত থাকিয়ে ৰাজ্যৰ ছাত্ৰ-ছাত্ৰী সকলে অনলাইন ক্লাছ কৰি আছে, সেই সময়ত বিশ্বনাথৰ এখন গাওঁৰ ৰাইজে আজি পৰ্যন্ত দেখা পোৱা নাই বিদ্যুতৰ পোহৰ।
বৰ্তমান শিক্ষা গ্ৰহণৰ ক্ষেত্ৰত যি সময়ত ডিজিটেল ইণ্ডিয়াৰ কথা কোৱা হয় সেই সময়তে দেখা গৈছে বিকশিত অসমৰ এক অপ্ৰত্যাশিত ছবি।
দেশ তথা ৰাজ্যত কৰ’না মহামাৰীৰ বাবে বিদ্যালয় মহাবিদ্যালয় সমূহ বন্ধ ৰাখি ছাত্ৰ-ছাত্ৰী সকলক প্ৰদান কৰা হৈছে অনলাইন ক্লাছ। তেনে সময়তে অন্ধকাৰত জীৱন নিৰ্বাহ কৰিছে বিশ্বনাথৰ এখন গাওঁৰ ৰাইজ তথা ছাত্ৰ-ছাত্ৰী সকল।
এই গাওঁখন আছে বিশ্বনাথৰ অসম-অৰুণাচল সীমান্তবৰ্তী এলেকাত। কিন্তু সীমান্তবৰ্তী এলেকা যদিও এই গাওঁখনৰ নাম শুনিলেই সকলো মন্ত্ৰী-বিধায়ক অথবা সাংসদে চিনি পাব। কিয়নো এই গাওঁখনত আৰু কাষৰ গাওঁখনত বিগত সময়ত দুবাৰকৈ উগ্ৰপন্থী সংগঠনে চলাইছিল নৰ সংহাৰ।
হয়, বিশ্বনাথৰ অসম-অৰুণাচল সীমান্তৰ সোনাজুলি বা ভীমাজুলি বুলি ক’লে এটা সময়ত এই স্থানত মন্ত্ৰী-বিধায়ক অথবা সাংসদৰ সোঁত বৈছিল।
কিন্তু সেই ভীমাজুলিয়ে স্বাধীনতাৰ ৭৩বছৰ পাৰ হোৱাৰ পিছতো স্বাধীন দেশৰ জনসাধাৰণৰ সাধাৰণ প্ৰাপ্যৰ পৰাও আজি পৰ্যন্ত বঞ্চিত থাকিবলগীয়া হৈছে।
বিশ্বনাথৰ উত্তৰাঞ্চলৰ বালিচাং পঞ্চায়তৰ অন্তৰ্গত ১নং ভীমাজুলি গাঁৱৰ ৰাইজে অথবা ছাত্ৰ-ছাত্ৰী সকলে এই ডিজিটেল যুগতো দেখা নাপালে বিদ্যুতৰ পোহৰ।
কেৱল বিদ্যুতৰ পোহৰৰ পৰাই বঞ্চিত নহয়, আন আন উন্নয়নৰ পৰাও বঞ্চিত গাঁওবাসী। ৰাস্তা-ঘাটৰ লগতে বঞ্চিত বিদ্যুৎ সেৱাৰ পৰাও।
আনহাতে, যি সময়ত ৰাজ্যৰ ছাত্ৰ ছাত্ৰী সকলে অনলাইন ক্লাছ কৰাৰ বাবে চৰকাৰৰ পৰা এনড্ৰইড ফোন বিচাৰি দাবী জনাইছে, তেনে সময়তে বিশ্বনাথৰ এখন গাওঁ আজি পৰ্যন্ত বিদ্যুতৰ পৰা বঞ্চিত হোৱা ঘটনাই সচেতন ৰাইজৰ চকু কপালত তুলিছে।