ঝাৰখণ্ডৰ জামছেদপুৰত শেহতীয়াকৈ এক অতি মৰ্মান্তিক ঘটনা সংঘটিত হৈছে। এখন বিয়াৰ ভোজ খাবলৈ গৈ ৰসগুল্লা ডিঙিত লাগি এজন ৪১ বছৰীয়া ব্যক্তিৰ মৃত্যু হোৱা ঘটনাই সমগ্ৰ অঞ্চলটোতে চাঞ্চল্যৰ সৃষ্টি কৰিছে। যি সময়ত বিয়াৰ ঘৰত হাঁহি-ফুৰ্টিৰ পৰিৱেশ বিৰাজ কৰি আছিল, সেই সময়তে এই আকস্মিক ঘটনাই সকলোকে স্তব্ধ কৰি পেলায়। মালিয়ানতা গাঁৱৰ নিবাসী ললিত সিং নামৰ ব্যক্তিজনে সোমবাৰে পুৱা বেলাজুৰি পঞ্চায়তৰ এক বিবাহ অনুষ্ঠানত অংশগ্ৰহণ কৰিছিল। কিন্তু কোনেও ভবা নাছিল যে সেইটোৱেই তেওঁৰ জীৱনৰ শেষ ভোজ হ’ব।
প্ৰত্যক্ষদৰ্শীৰ মতে, ললিত সিঙে বিয়াৰ ভোজ খাই থকাৰ সময়তে এটা ৰসগুল্লা তেওঁৰ ডিঙিত আবদ্ধ হৈ পৰে। ইয়াৰ লগে লগে তেওঁৰ উশাহ বন্ধ হৈ আহে আৰু তেওঁ চটফাবলৈ ধৰে। ওচৰত থকা আন অতিথি আৰু আত্মীয়সকলে তেওঁক সহায় কৰিবলৈ আপ্রাণ চেষ্টা চলাইছিল। তেওঁলোকে ডিঙিত লাগি ধৰা মিঠাইটোক উলিয়াই আনিবলৈ চেষ্টা কৰিছিল যদিও কোনো সুফল পোৱা নগ’ল। লাহে লাহে ললিতৰ অৱস্থা অধিক সংকটজনক হৈ পৰে আৰু তেওঁ সংজ্ঞা হেৰুৱাই মাটিত ঢলি পৰে।
পৰিস্থিতি অধিক ভয়াৱহ হোৱা দেখি ললিতৰ দেউতাকে তেওঁক ততাতৈয়াকৈ ওচৰৰ এখন চিকিৎসালয়লৈ লৈ যায়। কিন্তু চিকিৎসালয় পোৱাৰ পিছত চিকিৎসকে পৰীক্ষা কৰি ললিতক মৃত বুলি ঘোষণা কৰে। চিকিৎসকে জনোৱা মতে, ৰসগুল্লাৰ টুকুৰাটোৱে ললিতৰ উশাহ লোৱা নলীত বাধাৰ সৃষ্টি কৰিছিল। ইয়াৰ ফলত তেওঁৰ শৰীৰলৈ অক্সিজেনৰ যোগান বন্ধ হৈ গৈছিল আৰু অতি কম সময়ৰ ভিতৰতে তেওঁৰ মৃত্যু হয়। পৰৱৰ্তী সময়ত মৰণোত্তৰ পৰীক্ষাৰ জৰিয়তেও একেই তথ্য পোহৰলৈ আহে।
এই শোকাৱহ ঘটনাই বিয়াৰ আনন্দ এক মুহূৰ্ততে ম্লান কৰি পেলায়। এজন সুস্থ মানুহৰ এনেদৰে খাদ্য খাবলৈ গৈ মৃত্যু হোৱা কথাই পৰিয়ালটোলৈ চৰম দুখ নমাই আনিছে। মৰণোত্তৰ পৰীক্ষাৰ শেষত আৰক্ষীয়ে মৃতদেহটো পৰিয়ালৰ লোকক গতাই দিয়ে। বৰ্তমান ললিতৰ মৃত্যুত গাঁওখনৰ লগতে বিয়াৰ ঘৰত এক শোকাকুল পৰিৱেশ বিৰাজ কৰিছে।
