শিৱসাগৰ নগৰৰ গায়ন গাঁৱত আজি পুৱা ৯-০০ মান বজাত এজন ২৮ বছৰীয়া যুৱকৰ মৃতদেহ উদ্ধাৰ হোৱাত অঞ্চলটোত এটা চাঞ্চল্যকৰ পৰিস্থিতিৰ সৃষ্টি হৈছে। ৰহস্যজনক পৰিস্থিতিত আকস্মিকভাৱে মৃত্যু হোৱা যুৱকজনৰ নাম শিবা বিশ্বকৰ্মা্ বুলি জানিব পৰা গৈছে। যুৱকজনৰ ঘৰ গহপুৰৰ মাগনীত বুলি জানিব পৰা গৈছে। মৃত যুৱকজনে মৃত্যুৰ দিনা নিশা কটোৱা শিৱসাগৰৰ বন্ধুগৰাকীয়ে জনোৱা মতে শিবাই যোৰহাটত ছেমছাং মোবাইল কোম্পানীৰ ছেলছ বিভাগত কাম কৰিছিল।
শিবাৰ শিৱসাগৰৰৰ বন্ধুগৰাকীৰ ভাষ্য অনুসৰি যোৱা ৯ ছেপ্টেম্বৰ দেওবাৰে আবেলি শিবাই যোৰহাটৰ পৰা তেওঁৰ ঘৰলৈ ফুৰিবলৈ আহিছিল। তেওঁ সোমবাৰৰ দিনটো বন্ধুজনৰ লগত শিৱসাগৰত ঘূৰি-ফুৰি ৰাতি চিনেমাও চাইছিল। আজি পুৱা শিবাই তেওঁৰ যোৰহাটৰ কৰ্মস্থলীলৈ যোৱাৰ কথা আছিল। কিন্তু বন্ধুজনে যেতিয়া শিবাক ৰাতিপুৱা জগাবলৈ যায়, তেতিয়া তেওঁক মৃত অৱস্থাত প্ৰত্যক্ষ কৰে।
বন্ধুজনে লগতে প্ৰকাশ কৰিছে যে যোৱা ৰাতি শিবাই অত্যাধিক মদ্যপান কৰিছিল আৰু হাঁহৰ মাংসৰ সৈতে ভাত খাইছিল।
আৰক্ষীয়ে ইতিমধ্যে যুৱকজনৰ অস্বাভাৱিক মৃত্যু সন্দৰ্ভত এটা বিভাগীয় তদন্ত আৰম্ভ কৰিছে।
