৬১ বছৰ বয়সত গৌৰী স্প্ৰেটৰ সৈতে যুগ্ম জীৱন আৰম্ভ কৰিলে আমিৰ খানে

বলিউডৰ জনপ্ৰিয় অভিনেতা আমিৰ খানে তেওঁৰ জীৱনৰ এক নতুন অধ্যায় আৰম্ভ কৰিছে। ৬১ বছৰ বয়সত অভিনেতাগৰাকীয়ে তেওঁৰ দীৰ্ঘদিনীয়া বান্ধৱী তথা সংগী গৌৰী স্প্ৰেটৰ সৈতে বিবাহপাশত আৱদ্ধ হয়। মুম্বাইৰ বান্দ্ৰাত অৱস্থিত আমিৰ খানৰ বাসগৃহত অতি ব্যক্তিগতভাৱে এই বিবাহ পঞ্জীয়ন সম্পন্ন হয়। এই বিশেষ অনুষ্ঠানত কেৱল পৰিয়ালৰ সদস্য আৰু ঘনিষ্ঠ বন্ধু-বান্ধৱীসকলহে উপস্থিত আছিল। দীৰ্ঘদিন ধৰি তেওঁলোকৰ সম্পৰ্কক লৈ চৰ্চা চলি আছিল, কিন্তু এতিয়া এই সম্পৰ্কই আনুষ্ঠানিক ৰূপ পালে।

আমিৰ খান আৰু গৌৰী স্প্ৰেটে ইজনে সিজনক প্ৰায় ২৫ বছৰ ধৰি চিনি পায়। অৱশ্যে প্ৰায় দুবছৰ পূৰ্বে তেওঁলোকৰ বন্ধুত্বই প্ৰেমৰ ৰূপ লৈছিল। চলিত বৰ্ষতে দুয়ো নিজৰ সম্পৰ্কৰ কথা ৰাজহুৱাকৈ স্বীকাৰ কৰিছিল। ইয়াৰ পিছৰে পৰা তেওঁলোকৰ বিবাহক লৈ বিভিন্ন জল্পনা-কল্পনা চলি আছিল। অৱশেষত দেওবাৰে পৰিয়াল আৰু ঘনিষ্ঠ বন্ধু-বান্ধৱীসকলৰ উপস্থিতিত দুয়ো বিবাহপাশত আৱদ্ধ হয়।

এই সমগ্ৰ বিবাহ অনুষ্ঠানটো সম্পূৰ্ণ ব্যক্তিগত কৰি ৰখা হৈছিল। দেওবাৰে দুপৰীয়াৰ ভাগত দুয়ো বিবাহৰ নথিত স্বাক্ষৰ কৰে। অনুষ্ঠানত উপস্থিত থকা লোকসকলৰ মতে এই মুহূৰ্তটো দুয়োৰে বাবে অতি আৱেগিক আৰু স্মৰণীয় আছিল। বিয়াত প্ৰায় ১৫০ গৰাকী অতিথি উপস্থিত আছিল, য’ত পৰিয়ালৰ সদস্য, ঘনিষ্ঠ বন্ধু আৰু বিদেশৰ পৰা অহা আত্মীয়ও অন্তৰ্ভুক্ত আছিল।

আমিৰ খানৰ তিনি সন্তান ক্ৰমে জুনেইদ খান, ইৰা খান আৰু আজাদ এই বিশেষ মুহূৰ্তত উপস্থিত আছিল। ইয়াৰ লগতে গৌৰী স্প্ৰেটৰ পুত্ৰয়ো এই অনুষ্ঠানত অংশগ্ৰহণ কৰে। পৰিয়ালৰ সকলো সদস্যই নৱদম্পতীক শুভেচ্ছা জ্ঞাপন কৰে। সমগ্ৰ অনুষ্ঠানটো অতি সৰলতা আৰু এক পাৰিবাৰিক পৰিৱেশৰ মাজত সম্পন্ন হয়।

প্ৰণিধানযোগ্য যে আমিৰ খানৰ এইখন তৃতীয় বিবাহ। ইয়াৰ পূৰ্বে তেওঁ ৰীণা দত্তৰ সৈতে বিবাহপাশত আৱদ্ধ হৈছিল, যাৰ ফালৰ পৰা তেওঁৰ জুনেইদ আৰু ইৰা নামৰ দুটি সন্তান আছে। পিছলৈ তেওঁ চলচ্চিত্ৰ নিৰ্মাতা কিৰণ ৰাওক বিয়া কৰাইছিল আৰু তেঁওলোকৰ আজাদ নামৰ এজন পুত্ৰ সন্তান আছে। ২০২১ চনত আমিৰ আৰু কিৰণে পৃথক হোৱাৰ সিদ্ধান্ত লৈছিল, যদিও আজিও তেওঁলোকে মিলি নিজৰ পুত্ৰৰ চোৱাচিতা কৰি আছে। বিশেষ কথা এই যে, এই বিবাহ অনুষ্ঠানত আমিৰ খানৰ পূৰ্বৰ দুই পত্নীও উপস্থিত আছিল।

গৌৰী স্প্ৰেট মূলতঃ বেংগালুৰুৰ বাসিন্দা আৰু তেওঁ দীৰ্ঘদিন ধৰি ৱেলনেচ আৰু বিউটী ইণ্ডাষ্ট্ৰীৰ সৈতে জড়িত হৈ আছে। তেওঁ লণ্ডনৰ ইউনিভাৰ্চিটি অব দি আৰ্টছৰ পৰা ষ্টাইলিং আৰু ফটোগ্ৰাফীৰ শিক্ষা গ্ৰহণ কৰিছে। বৰ্তমান তেওঁ মুম্বাইত এটা বিখ্যাত চেলুন পৰিচালনা কৰে। অৱশ্যে তেওঁ সদায় লাইমলাইটৰ পৰা আঁতৰত থকাটো পচন্দ কৰে আৰু ছচিয়েল মিডিয়াটো বৰ বেছি সক্ৰিয় নহয়।