সমাগত ৰাভা হাছং স্বায়ত্তশাসিত পৰিষদৰ নিৰ্বাচনৰ বাবে সম্পূৰ্ণ সাজু হৈছে আম আদমী পাৰ্টি। আগন্তুক নিৰ্বাচনত পৰিষদ দখলৰ উদ্দেশ্যে দলটোৰ নেতৃত্বই অসম ভূমিপুত্ৰ ঐক্যমঞ্চৰ সৈতে মিত্ৰতা সম্পন্ন কৰিছে।
আজি বকো প্ৰেছ ক্লাৱত অনুষ্ঠিত এক যৌথ সংবাদমেলত এই সন্দৰ্ভত বিতংভাৱে অৱগত কৰে আপৰ ৰাজ্যিক উপ সভাপতি অনুৰূপা ডেকাৰজাৰ লগতে ভূমিপুত্ৰ ঐক্যমঞ্চৰ নেতা মিলন ৰাভাই।
সংবাদমেলত আপৰ জ্যেষ্ঠ নেত্ৰীগৰাকীয়ে কয়, “স্বায়ত্তশাসিত পৰিষদৰ উন্নয়নৰ স্বাৰ্থত ৰাইজে আপৰ প্ৰাৰ্থী সকলক জয়যুক্ত কৰিব। অহা ১৩ মাৰ্চত আম আদমী পাৰ্টি আৰু ভূমিপুত্ৰ ঐক্যমঞ্চৰ প্ৰথমটো প্ৰাৰ্থী তালিকা প্ৰকাশ কৰা হ’ব। সাধাৰণ মানুহৰ বাবে স্বাস্থ্যসেৱা, শৈক্ষিক খণ্ডৰ উন্নয়ন আৰু জনগোষ্ঠীয় বিকাশৰ স্বাৰ্থত ৰাভা হাছং স্বায়ত্তশাসিত পৰিষদৰ ভোটাৰে আপৰ সপক্ষে ৰায় দিব। “
দলৰ ৰাজ্যিক উপ সভাপতি তথা মুখ্য মুখপাত্ৰ অনুৰূপা ডেকাৰজাই বিগত বহুদিন ধৰি ৰাভা হাছং এলেকাত সাংগঠনিক কাম-কাজ অব্যাহত ৰখাৰ বিষয়ে সদৰি কৰে। অনাগত দিনত আপে স্বায়ত্ত শাসিত পৰিষদৰ উপৰি ইয়াৰ বাহিৰৰ অঞ্চল সমূহত পঞ্চায়ত নিৰ্বাচন আৰু ২০২৬ চনৰ বিধানসভা নিৰ্বাচনৰ বাবেও তৎপৰতা আৰম্ভ কৰিছে। আপৰ উন্নয়নৰ ৰাজনীতি জনসাধাৰণে আকোঁৱালি ল’ব বুলি ডেকাৰজাই আশা প্ৰকাশ কৰে।
আনহাতে ভূমিপুত্ৰ ঐক্যমঞ্চৰ নেতা মিলন ৰাভাই কয়, “আমি ৩৬ টা সমষ্টিতে প্ৰতিদ্বন্দ্বিতা কৰিম। বুজাবুজিৰ ভিত্তিত আম আদমী পাৰ্টি আৰু অসম ভূমিপুত্ৰ ঐক্যমঞ্চৰ পৰা প্ৰাৰ্থী প্ৰক্ষেপ কৰা হ’ব। ঐক্যবদ্ধ প্ৰতিদ্বন্দ্বিতাৰ জৰিয়তে আমি স্বায়ত্ত শাসিত পৰিষদৰ নিৰ্বাচনত সফলতা অৰ্জন কৰিবলৈ সক্ষম হ’ম।” সংবাদমেলত আপৰ ৰাজ্যিক সম্পাদক (প্ৰশাসনিক) ভিক্টৰ গগৈ, দক্ষিণ কামৰূপ জিলা কমিটীৰ সভাপতি অনিৰুদ্ধ বড়ো আৰু যুটীয়া সম্পাদক জয়ন্ত শইকীয়াও উপস্থিত থাকে।
