প্ৰকৃতিপ্ৰেমীৰ ব্যাপক প্ৰতিবাদৰ পাছতো মুম্বাইৰ আৰে কলনিত অব্যাহত আছে গছ কটা কাৰ্য। মহাৰাষ্ট্ৰ চৰকাৰৰ নিৰ্দেশত এতিয়ালৈ ২৫০০ৰো অধিক গছ কাটি পেলোৱা হৈছে বুলি এটা সূত্ৰই প্ৰকাশ কৰিছে।
অৱশ্যে প্ৰশাসনে এই পৰ্যন্ত কিমান গছ কটা হৈছে তাৰ কোনো ৰাজহুৱা তথ্য প্ৰকাশ কৰা নাই। কিন্তু আজিও অঞ্চলটোত বিভাগীয় বিষয়াৰ উপস্থিতিত গছ কটা কাৰ্য অব্যাহত ৰাখিছে।
জানিব পৰা মতে অন্তিম পৰ্যায়ত চলি আছে গছ কটা কাৰ্য। আজি সন্ধিয়ালৈ অঞ্চলটোৰ সকলোবোৰ গছ কটা যাব। আৰু ইয়াৰ পাছত বিভাগীয় কৰ্তৃপক্ষই গছবোৰ টুকুৰা কৰি ট্ৰাকত লৈ যাব।
ইফালে এনেদৰে বন ধংস যজ্ঞ চলোৱা কাৰ্যক তীব্ৰ ভাষাৰে গৰিহনা দি শিৱসেনা নেতা আদিত্য ঠাকৰেই কয়, ‘গছ কটা লোকসকলক পাক অধীকৃত কাশ্মীৰক পঠিয়াই দিব লাগে’।
চৰকাৰৰ এনে হঠকাৰী সিদ্ধান্তক আৰম্ভণিৰে পৰা বিৰোধিতা তথা প্ৰতিবাদ কৰি অহা এটা ছাত্ৰ প্ৰতিনিধি দলে আজি মুখ্য ন্যয়াধীশ ৰঞ্জন গগৈক সাক্ষাৎ কৰিব। প্ৰতিনিধি দলটোৱে মুখ্য ন্যায়াধীশক নিজা আবাসত দুপৰীয়া তিনি বজাত সাক্ষাৎ কৰিব।
সাক্ষাতৰ সময়ত প্ৰতিনিধি দলটোৱে মুখ্য ন্যায়াধীশ গৰাকীক নিজৰ বিশেষাধিকাৰ প্ৰয়োগ কৰি গছ কটা কাৰ্য বন্ধ কৰিবলৈ আহ্বান জনাব।
উল্লেখ্য যে মহাৰাষ্ট্ৰ চৰকাৰে মেট্ৰ’ ৰেইল প্ৰজেক্টৰ বাবে মুম্বাইৰ আৰে কলনিত এইদৰে বন ধংস যজ্ঞ চলাইছে।