সমাগত পঞ্চায়ত নিৰ্বাচনত ৰাজ্যখনৰ চাহ শ্ৰমিকসকলে বিজেপিক বৰ্জন কৰিব। তদুপৰি, সদৌ আদিবাসী ছাত্ৰ সন্থাই আনকি চাহ বাগিচা অঞ্চলত বিজেপিৰ নেতা-কৰ্মীসকলৰ প্ৰৱেশো নিষিদ্ধ কৰাৰ সিদ্ধান্ত গ্ৰহণ কৰিছে। বৃহস্পতিবাৰে নতুন দিল্লীত আদিবাসী ছাত্ৰ সন্থাৰ সভাপতি ষ্টিফেন লাক্ৰাই এই কথা সদৰী কৰে।
বিজেপিয়ে নিৰ্বাচনৰ পূৰ্বে যিবোৰ প্ৰতিশ্ৰুতি দিছিল তাৰ এটাও আজিলৈকে পূৰণ নকৰিলে বুলি উল্লেখ কৰি লাক্ৰাই বিজেপিক প্ৰতাৰক আখ্যা দিয়ে। চাহ শ্ৰমিকসকলক লৈ বিজেপিয়ে নিকৃষ্ট ৰাজনীতি কৰাৰ অভিযোগ তুলি ছাত্ৰ নেতা গৰাকীয়ে কয় যে বিজেপিয়ে ধনবল প্ৰয়োগ কৰি চাহ বাগিচাসমূহৰ চৰ্দাৰ পৰ্যায়ৰ লোকসকলক নিজৰ পক্ষলৈ নিয়াৰ ৰাজনীতি আৰম্ভ কৰিছে।
আনহাতে, চাহ শ্ৰমিক সম্প্ৰদায়ৰ জনপ্ৰতিনিধিসকলেও চাহ শ্ৰমিকসকলক চৰম প্ৰতাৰমা কৰি অহা বুলি স্পষ্ট কৰি দি লাক্ৰাই কয় যে মন্ত্ৰী পল্লৱ লোচন দাস, সাংসদ কামাখ্যা প্ৰসাদ তাছা, ৰামেশ্বৰ তেলী আদিৰ দৰে নেতাসকলৰ ওপৰত চাহ শ্ৰমিকসকলৰ অকণো ভৰসা নাই।
তদুপৰি, চাহ শ্ৰমিকসকলক প্ৰতাৰণা কৰি অহা জনপ্ৰতিনিধিসকলক এশিকনি দিবলৈ আদিবাসী ছাত্ৰ সন্থা এইবাৰ সাজু হৈছে বুলি আছাৰ নেতা ষ্টিফেন লাক্ৰাই সদৰী কৰে।
ৰাজ্যখনৰ আদিবাসী লোকসকলে জনজাতিকৰণ আৰু মজুৰি বৃদ্ধিৰ দাবীত কৰি অহা আন্দোলনক চৰকাৰে অলপো গুৰুত্ব নিদিয়াৰ কথা উল্লেখ কৰি লাক্ৰাই কয় যে বিজেপি চৰকাৰে চাহ শ্ৰমিকসকলৰ প্ৰতি বৰ্তমান অধিক অৱহেলাহে কৰিবলৈ লৈছে।
আনহাতে, নিৰ্বাচনত চাহ শ্ৰমিকৰ ভোটেৰে অনায়াসে নিৰ্বাচিত হৈ জনপ্ৰতিনিধিসকলে সম্প্ৰতি তেওঁলোকৰ প্ৰতি দেখুওৱা অনীহাৰ বাবে এইবাৰ পঞ্চায়ত নিৰ্বাচনত আদিবাসী ছাত্ৰ সন্থাই বিজেপিক বৰ্জন কৰাৰ বাবে সিদ্ধান্ত গ্ৰহণ কৰা বিষয়টোৱে বিজেপিক শলঠেকত পেলোৱাৰ সম্ভৱনাই দেখা দিছে।