আজি শিৱসাগৰত আছুৰ উদ্যোগত ২৮ টা জনগোষ্ঠীয় সংগঠনৰ প্ৰতিনিধিয়ে নাগৰিকত্ব সংশোধনী বিধেয়ক বাতিলৰ বাবে দাবী পত্ৰ প্ৰদানৰ উদ্দেশ্য শিৱসাগৰ সমষ্টিৰ কংগ্ৰেছী বিধায়ক প্ৰণৱ গগৈৰ ঘৰত উপস্থিত হয়। প্ৰণৱ গগৈৰ অনুপস্থিতিত তেওঁৰ পুত্ৰ সমীৰ গগৈয়ে গ্ৰহণ কৰে এই দাবী পত্ৰ।
জাতি ধ্বংসী নাগৰিকত্ব সংশোধনী বিধেয়কে জাতীয় জীৱনৰ প্ৰতি যি অশনি সংকেত কঢ়িয়াই আনিছে তাৰ বিৰুদ্ধে স্থানীয় বিধায়ক প্ৰণৱ গগৈক বলিষ্ঠ কণ্ঠৰে মাত মাতি খিলঞ্জীয়াৰ পক্ষত থিয় দিবৰ বাবে সংগঠনকেইটাৰ নেতৃত্বই দাবী পত্ৰৰ জৰিয়তে অনুৰোধ জনায়।
দাবী পত্ৰ প্ৰদান কৰে সদৌ অসম ছাত্ৰ সন্থাৰ শিক্ষা সম্পাদক শৰৎ হাজৰীকাই। দাবী পত্ৰ প্ৰদানৰ সময়ত ২৮টা জনগোষ্ঠীয় সংগঠনৰ বহুকেইজন শীৰ্ষ পৰ্যায়ৰ নেতা-কৰ্মী উপস্থিত থাকে।
উল্লেখ্য যে অসমৰ জনসাধাৰণৰ ওপৰত কেন্দ্ৰীয় চৰকাৰে জাপি দিব খোজা জাতিধ্বংসী নাগৰিকত্ব (সংশোধনী) বিধেয়ক ২০১৬’ বাতিলৰ দাবী সাব্যস্ত কৰিবলৈ সদৌ অসম ছাত্ৰ সন্থা আৰু ২৮টা জনগোষ্ঠীয় সংগঠনৰ আহ্বানত অসমৰ মন্ত্ৰী, বিধায়ক, সাংসদসকলৰ ঘৰলৈ যোৱাৰ কাৰ্যসূচীৰ অংশ হিচাপেই আজি সংগঠন কেইটাই শিৱসাগৰ সমষ্টিৰ বিধায়ক প্ৰণৱ গগৈৰ বাসগৃহত উপস্থিত হয়।
