উজনি অসমৰ বগীবিল দলঙৰ দক্ষিণ পাৰ সংযোগী ধমল গাঁৱত অতি গোপনে টোলগেটৰ নিৰ্মাণকাৰ্য চলাই থকাৰ বিৰোধিতাত আজি সদৌ অসম ছাত্ৰ সন্থা আৰু অসম জাতীয়তাবাদী যুৱ ছাত্ৰ পৰিষদে তীব্ৰ প্ৰতিবাদ সাব্যস্ত কৰে।
বগীবিল দলং সংযোগী পথত টোলগেট নিৰ্মাণৰ বিৰুদ্ধে ছাত্ৰ সংগঠন দুটাই প্ৰায় এঘণ্টা সময় ধৰি প্ৰতিবাদী কাৰ্যসূচী ৰূপায়ণ কৰে।
বগীবিল দলং সংযোগী ৫২ নং ৰাষ্ট্ৰীয় ঘাইপথ অৱৰোধ কৰি প্ৰতিবাদ সাব্যস্ত কৰাৰ লগে সংগঠন দুটাৰ সদস্যসকলে হাতে হাতে প্লে কাৰ্ড লৈ চৰকাৰৰ বিৰুদ্ধে শ্লোগান দিয়া পৰিলক্ষিত হয়।
আছুৰ ডিব্ৰুগড় জিলা সমিতিৰ সাধাৰণ সম্পাদক শংকৰ জ্যোতি বৰুৱাই কয়, “আমি এই অঞ্চলত টোলগেট স্থাপনৰ বিৰোধিতা কৰো কিয়নো এই পথেৰে ধেমাজি আৰু লখিমপুৰ জিলাৰ বিভিন্ন অঞ্চলৰ ৰোগীসকল ডিব্ৰুগড়লৈ চিকিৎসাৰ বাবে আহে”।
টোলগেট নিৰ্মাণকাৰ্যৰ ২০ শতাংশ কাম সম্পূৰ্ণ হোৱা বুলি উল্লেখ কৰি আছুৰ কেন্দ্ৰীয় কাৰ্যনিৰ্বাহক সদস্য উদ্দীপ জ্যোতি গগৈয়ে কয়, “চাৰিলেনযুক্ত ৰাষ্ট্ৰীয় ঘাইপথৰ নিৰ্মাণকাৰ্য সম্পূৰ্ণ নহওতেই অবৈধভাৱে টোলগেট নিৰ্মাণ কৰিছে”।
