নাগৰিকত্ব সংশোধনী বিধেয়ক বাতিলৰ দাবীত আজি ঐতিহাসিক ৰংঘৰৰ বাকৰিত আছুয়ে খিলঞ্জীয়াৰ ৰণডংকা নামেৰে এক কাৰ্যসূচী ৰূপায়ণ কৰে। দিনৰ প্ৰায় ১১.৩০ বজাত ৰংঘৰৰ বাকৰিত আছুৰ লগতে বহুকেইটা সংগঠনৰ প্ৰতিনিধি তথা নাগৰিক সমাজৰ বহু ব্যক্তিয়ে এই কাৰ্যসূচীত অংশগ্ৰহণ কৰে।
শিৱসাগৰ তথা চৰাইদেউ জিলাৰ কেইবা হাজাৰ আছু কৰ্মীয়ে একত্ৰিত বৰকাঁহ, ডবা, শংখ বজাই চৰকাৰ বিৰোধী শ্ল’গানেৰে ৰংঘৰ বাকৰি উত্তাল কৰি তোলা খিলঞ্জীয়াৰ ৰণডংকা অনুষ্ঠানৰ শুভাৰম্ভ কৰে উজনিয়াল সত্ৰত সত্ৰাধিকাৰ তথা বৰ্ষিয়ান নাগৰিক লক্ষীকান্ত মহন্তই।
নিজ ভাষণত মহন্তই মুখ্য মন্ত্ৰী সৰ্বানন্দ সোনোৱালে জাতীয় নায়কৰ মৰ্য্যদা হেৰোৱাই পেলাইছে বুলি মন্তব্য কৰি কয় যে অসম চুক্তি উলংঘা কৰি নাগৰিকত্ব বিধেয়কৰ জৰিয়তে অসমত বিদেশী সংস্থাপিত হ’লে অসমৰ ভাষা সংস্কৃতি বিপন্ন হোৱাৰ লগতে অসমীয়া জাতিও নিশেষ হৈ যাব, সেয়ে সময় থাকেতেই আছুৰ নেতৃত্বত আৰম্ভ হোৱা ঐক্যবদ্ধ সংগ্ৰামত সকলো শ্ৰেণীৰ জনসাধাৰণ জপিয়াই পৰা উচিত।
আনহাতে ছাত্ৰ সন্থাৰ কেন্দ্ৰীয় সমিতিৰ মুখ্য সাংগঠনিক সম্পাদক ৰাজু ফুকনে কয়, হিন্দু মুছলমানৰ নামত ধৰ্মীয় ৰাজনীতি কৰা সৰ্বানন্দই অসমীয়াক বিশ্বাসঘাটকতা কৰিছে। তেওঁ লগতে প্ৰাক্তন আছু নেতা তথা বৰ্তমানৰ মন্ত্ৰী তপন গগৈক সমালোচনা কৰি কয় যে আছুৰ নেতৃত্বত ১১ বছৰ থকা তপন গগৈয়ে বৰ্তমান ‘বিজেপিৰ নেগুৰত ধৰি মন্ত্ৰী হোৱাৰ বাবে আছুৰ পতাকা নলবাৰীত দুস্কৃতিকাৰীয়ে গচকা ঘটনাৰ বহুদিন পাৰ হোৱাৰ পিছতো আজিলৈকে মৌন হৈ থকাটো চৰম অপমানৰ কথা।’
আজিৰ উক্ত সভাত ছাত্ৰ সন্থাৰ শিক্ষা সম্পাদক শৰৎ হাজৰিকা, আটাছুৰ কেন্দ্ৰীয় সমিতিৰ উপ সভাপতি বসন্ত গগৈ, উজনি অসম মুছলিম কল্যান পৰিষদৰ উপ সভাপতি মণিৰুল ইছলাম বড়া, জাতিয়তাবাদী যুৱ ছাত্ৰ পৰিষদৰ সভাপতি দিব্যজ্যোতি দাস, শিৱসাগৰ জিলা কৰ্মচাৰী পৰিষদৰ উপ সভাপতি ৰাজেন মিলি, শিৱসাগৰ প্ৰেছ ক্লাৱৰ সম্পাদক ইনামূল হাজৰিকাকে ধৰি বহু ব্যক্তি দল-সংগঠনৰ প্ৰতিনিধিয়ে ভাষণ প্ৰদান কৰে।
অনুষ্ঠানৰ শেষত আছুৰ প্ৰায় পাঁচ সহস্ৰাধিক প্ৰতিবাদকাৰীয়ে ৰংঘৰৰ বাকৰিৰ পৰা নগৰৰ বৰ্ডিং খেলপথাৰলৈকে সমদল কৰি বিভিন্ন চৰকাৰ বিৰোধী শ্ল’গানেৰে শিৱসাগৰৰ ৰাজপথ কঁপাই তোলে।