লকডাউনৰ মাজতে ৰাজ্যত পুনৰ প্ৰতিবাদী কৰ্যসূচী। প্ৰতিবাদী কাৰ্যসূচী গ্ৰহণ কৰিছে সদৌ অসম ছাত্ৰ সন্থাই।
অসমৰ লাভজনক আঠখন তৈলক্ষেত্ৰ ব্যক্তিগত কোম্পানীক গতোৱাৰ প্ৰতিবাদত আজি সদৌ শিৱসাগৰ জিলা ছাত্ৰ সন্থাই এক প্ৰতিবাদী কাৰ্যসূচী গ্ৰহণ কৰে।
অ’ এন জি চি অসম সম্পদৰ শিৱসাগৰস্থিত ডি বি জি কাৰ্যালয়ৰ সন্মুখত এই প্ৰতিবাদী কাৰ্যসূচী গ্ৰহণ কৰা হয়।
আছুৰ সদস্যই সামাজিক দূৰত্ব বজাই ৰাখি হাতে হাতে প্লে’ কাৰ্ড লৈ বিজেপি হুচিয়াৰ, ৰাজ্য চৰকাৰ হায় হায়, তৈলক্ষেত্ৰ ব্যক্তিগতকৰণ বাতিল কৰক, কেন্দ্ৰীয় চৰকাৰ হায় হায় আদি শ্ল’গানেৰে পৰিৱেশ উত্তাল কৰি তোলে।
আছুৰ শিক্ষা সম্পাদক শৰৎ হাজৰিকাই কয়, ‘কেন্দ্ৰীয় পেট্ৰলিয়াম মন্ত্ৰালয়ে অসমৰ আঠখন তৈলক্ষেত্ৰ বাহিৰাগত কোম্পানীৰ হাতত গতোৱাৰ সিদ্ধান্ত তীব্ৰ বিৰোধিতা কৰো আৰু কেন্দ্ৰীয় চৰকাৰক এই সিদ্ধান্ত বাতিল কৰিবলৈ দাবী জনাইছো।’
‘অন্যথা সদৌ অসম ছাত্ৰ সন্থাই তীব্ৰ গণতান্ত্ৰিক আন্দোলনৰ কাৰ্যসূচী গ্ৰহণ কৰিবলৈ বাধ্য হ’ব বুলি প্ৰতিবাদস্থলীত তেওঁ হুংকাৰ দিয়ে।
উল্লেখযোগ্য যে লকডাউনৰ সুবিধা লৈ কেন্দ্ৰীয় পেট্ৰলিয়াম মন্ত্ৰ্যালয়ে দেশৰ বিভিন্ন ৰাজ্যৰ তৈলক্ষেত্ৰ সমূহৰ লগতে অ’ এন জি চিৰ অধীনত থকা অসমৰ ৮খন তৈলক্ষেত্ৰ ব্যক্তিগত কোম্পানীৰ হাতত গতোৱাৰ প্ৰক্ৰিয়া ইতিমধ্যে হাতত লৈছে।
ইয়াৰোপৰি দিহিং পাটকাই অভয়াৰণ্যত মুকলিকৈ কয়লা খননৰ অনুমতি প্ৰদান কৰিছে কেন্দ্ৰীয় চৰকাৰে। কেন্দ্ৰীয় চৰকাৰৰ এনে হতকাৰী সিদ্ধান্তৰ বিৰুদ্ধে ৰাজ্যত বিভিন্ন দল সংগঠনে প্ৰতিবাদী কাৰ্যসূচী ৰূপায়ন কৰাৰ লগতে বহু ব্যক্তিয়ে চ’চিয়েল মিডিয়াৰ জৰিয়তেও প্ৰতিবাদ সাব্যস্ত কৰিছে।
