আজি বিশ্ব পৰিবেশ দিৱস। অসমৰ বিভিন্ন প্ৰান্তৰ লগতে শিৱসাগৰৰ বিভিন্ন স্থানতো পালন কৰা হৈছে বিশ্ব পৰিবেশ দিৱস।
সদৌ তাই আহোম ছাত্ৰ সন্থা(আটাছু)ৰ উদ্যোগত আজি হাঁহচৰা গাওঁ পঞ্চায়তত বৃক্ষ ৰোপন কাৰ্যসূচীৰে বিশ্ব পৰিবেশ দিৱস পালন কৰা হয়।
এই কাৰ্যসূচীত উপস্থিত থাকে আটাছুৰ কেন্দ্ৰীয় সহ: সাধাৰণ সম্পাদক জয়ন্ত সন্দিকৈ, কেন্দ্ৰীয় সাংগঠনিক সম্পাদক প্ৰশান্ত বৰগোহাঁই আৰু শিৱসাগৰ জিলা সমিতিৰ উপ সভাপতি তপন চেতিয়া।
সেইদৰে,হাঁহচৰা গাওঁ পঞ্চায়তৰ সভানেত্ৰী প্ৰীতি দুৱৰা, সচিব প্ৰধান চন্দ্ৰ গগৈ, হাঁহচৰা উচ্চতৰ মাধ্যমিক বিদ্যালয়ৰ প্ৰাক্তন প্ৰধান শিক্ষক কাশিনাথ কোঁৱৰ, বিষয় শিক্ষক দিগন্ত সন্দিকৈকে ধৰি বহু গণ্য মান্য ব্যক্তিও ইয়াত উপস্থিত থাকে।
বৃক্ষ ৰোপন কাৰ্যসূচীত অংশ গ্ৰহণ কৰি আটাছুৰ শিৱসাগৰ জিলা সমিতিৰ উপ সভাপতি তপন চেতিয়াই কয় যে আমাৰ ভৱিষ্যত প্ৰজন্মৰ জীৱন সুৰক্ষিত কৰি ৰাখিবলৈ তথা অসমৰ প্ৰকৃতিক ভাল পোৱা প্ৰতিজন ব্যক্তিয়ে আজি একোটাকৈ গছ পুলি ৰুব লগে।
তেওঁ লগতে অসমৰ আমাজন খ্যাত দিহিং পাটকাইত চৰকাৰে যি মুক্ত কয়লা খননৰ অনুমতি দিছে সেয়া অতি সোনকালে বাতিল কৰিবলৈ মুখ্য মন্ত্ৰীক দাবী জনোৱাৰ লগতে দিহিং পাটকাইৰ প্ৰাকৃতিক পৰিৱেশ সুৰক্ষিত কৰি ৰাখিবলৈ আহ্বান জনায়।
