৯১টা বলত ২৩৩ ৰান! এদিনীয়াত অভিষেকৰ তাণ্ডৱ দেখি চকু কপালত উঠিল ক্ৰিকেট অনুৰাগীৰ

দীৰ্ঘদিন ধৰি আন্তঃৰাষ্ট্ৰীয় ক্ৰিকেটত তেওঁ ছন্দত নাই। আয়াৰলেণ্ডত তেওঁ ৰান কৰিব পৰা নাছিল। জিম্বাবুৱে ভ্ৰমণৰ সময়তো তেওঁৰ প্ৰদৰ্শন বিশেষ নাছিল। বাৰে বাৰে বলাৰৰ ফান্দত পৰি আউট হৈছে। তিনিখন মেচত ক্ৰমে ১, ৮ আৰু ২ ৰান সংগ্ৰহ কৰিছে। এনে ছন্দহীতাৰ বাবে অভিষেক শৰ্মা সমালোচিতও হৈছে।

এইবাৰ হয়তো তাৰ উত্তৰ দিয়াৰ পাল। কাৰণ তেওঁৰ বেটিঙৰ কথা ক’লে সমালোচকসকলে মুখ বন্ধ কৰি দিব। সেইটোৱেই কৰিলে অভিষেকে। ঘৰুৱা ক্ৰিকেটত বিস্ফোৰক ইনিংছ খেলি বাওঁহতীয়া তাৰকাগৰাকীয়ে এদিনীয়া খেলত  দ্বিশতক অৰ্জন কৰে।

তাৰকা বেটছমেনগৰাকীয়ে পঞ্জাৱ আন্তঃজিলা ছিনিয়ৰ প্ৰতিযোগিতাত অমৃতসৰৰ হৈ খেলিছিল। আন্তঃৰাষ্ট্ৰীয় ক্ৰিকেটত ৰান নকৰাৰ বেদনাই হয়তো তেওঁক কুটি কুটি খাইছিল। অভিষেকক ওচৰৰ পৰা চিনি পোৱাসকলে জানে যে যিদিনা তেওঁ বেটিং চলে, সেইদিনা বলাৰসকলৰ দৰ্শক হোৱাৰ বাহিৰে আন উপায় নাথাকে। মাত্ৰ ৯১টা বলত ২৩৩ ৰানৰ ‘ছুপাৰ চাইক্লনিক’ ইনিংছ খেলিলে। তেওঁৰ ইনিংছত ১৫টা চাৰি আৰু ২৫টা ছয়েৰে সজোৱা হৈছিল। ষ্ট্ৰাইক ৰেট ২৫৬.০৪।

দেওবাৰে অমৃতসৰৰ গান্ধী গ্ৰাউণ্ডত অনুষ্ঠিত এই মেচখনত আৰম্ভণিৰে পৰাই অভিষেক আছিল আক্ৰমণাত্মক মুডত। তৰণ তাৰণৰ বলাৰসকলক তেওঁ একেবাৰেই ৰেহাই দিয়া নাছিল। অভিষেকৰ বিস্ফোৰক ইনিংছৰ বাবেই অমৃতসৰে ৫০ অভাৰত ৮টা উইকেট হেৰুৱাই ৫৩৩ ৰানৰ পাহাৰসদৃশ ৰান সংগ্ৰহ কৰে।

অভিষেকৰ এই বিধ্বংসী ইনিংছৰ ভিডিঅ’ আৰু স্ক’ৰ কাৰ্ড এতিয়া ছ’চিয়েল মিডিয়াত ভাইৰেল হৈছে। নেটিজেনে তেওঁৰ ইনিংছক ‘ষ্টেটমেণ্ট ন’ক’ বুলি অভিহিত কৰিছে। আৰু খেলপথাৰত উপস্থিত থকাসকলৰ একেবাৰে ‘শৰীৰ-মন জুৰ’ পৰিছিল।

বছৰৰ আৰম্ভণিতে আই চি চি টি-২০ বেটছমেন ৰেংকিঙৰ শীৰ্ষত থকা অভিষেক এতিয়া তিনি নম্বৰত আছে। জিম্বাবুৱে ভ্ৰমণৰ সময়ত তেওঁ তিনিটা ইনিংছত মাত্ৰ ১১ ৰানহে সংগ্ৰহ কৰিছিল। গড়ে ৩.৬৬। ইয়াৰ পূৰ্বে ইংলেণ্ডৰ বিৰুদ্ধে ৫ খন টি-২০ত ১৩১ ৰান সংগ্ৰহ কৰিছিল। গড়ে ২৬.২। আয়াৰলেণ্ডৰ বিৰুদ্ধে দুখন মেচত ৪৯ ৰান। গড়ে ২৪.৫। যোৱা ১০খন টি-২০ত তেওঁ মাত্ৰ এটাহে অৰ্ধশতক অৰ্জন কৰিছে। টি-২০ বিশ্বকাপত তেওঁ অফ স্পিনৰ বিৰুদ্ধে কেইবাবাৰো উইকেট দিছে।

ABHISHEK SHARMA MAKES A STATEMENT 🔥

– He smashed 233 runs from just 91 balls with 15 fours & 25 sixes against Tarn Taran Men Sr in the One Day District match pic.twitter.com/QV4k83Oo5e

— Johns. (@CricCrazyJohns) August 2, 2026

বিশ্বকাপৰ পাছতো বিপক্ষ দলৰ অধিনায়কে তেওঁক সেই দুৰ্বলতাৰ ওপৰত বাৰে বাৰে আঘাত কৰিছে। পৰিসংখ্যাইও একে ছবি দাঙি ধৰিছে। বিশ্বকাপৰ পূৰ্বে অভিষেকৰ গড় আছিল ৩৭.০৫। তেওঁৰ ষ্ট্ৰাইক ৰেট আছিল প্ৰায় ১৯৫। বিশ্বকাপৰ পিছত সেই গড় ১৯.৪ লৈ নামি আহিছিল। তেওঁৰ ষ্ট্ৰাইক ৰেটও প্ৰায় ১৬৫ লৈ নামি আহিল। সেইবাবেই বহুতে বিশ্বাস কৰে যে ২৩৩ ৰানৰ এই ইনিংছে নিঃসন্দেহে তেওঁৰ আত্মবিশ্বাস ঘূৰাই আনিব।