সদৌ বিটিচি সংখ্যালঘু ছাত্ৰ সন্থা (ABMSU)-এ অখিল গগৈসহ কাৰাবন্দী হৈ থকা কৃষক মুক্তি সংগ্ৰাম সমতিৰি আটাইকেইজন নেতাক বিনা চৰ্তে শীঘ্ৰে মুকলি কৰি দিবলৈ চৰকাৰক দাবী জনায়।
মাওবাদীৰে সম্পৰ্ক ৰক্ষা কৰি অহাকে ধৰি কেইবাটাও অভিযোগত NIA আৰু অসম আৰক্ষীয়ে গ্ৰেপ্তাৰ কৰি ৰখা সংগঠনটোৰ নেতাকেইজনক ৰাজ্য চৰকাৰে ‘প্ৰতিশোধমূলকভাৱে’ জে’লত ভৰাই ৰাখিছে বুলি ABMSU-এ দেওবাৰে এক প্ৰেছ বিজ্ঞপ্তিত অভিযোগ কৰে।
বৰ্তমানৰ শাষকপক্ষ আৰু নাগৰিকত্ব সংশোধন আইনৰ বিৰুদ্ধে জনগণৰ হৈ মাত মাতি অহাৰ বাবেই অখিল গগৈৰ লগতে কৃষক মুক্তিৰ কাৰাবন্দী নেতাসকলে ইয়াৰ মূল্য ভৰিব লগা হৈছে বুলি সংগঠনটোৰ সাধাৰণ সম্পাদক টাইছন হুছেইনে এই প্ৰতিবেদকক আগত কয়।
তেওঁ আৰু কয়, ‘এটাৰ পিছত আনটোকৈ গোচৰ জাপি তেওঁলোকক এইদৰে বাৰম্বাৰ গ্ৰেপ্তাৰ কৰি অহা কাৰ্য চিধা-চিধি জনতাৰ যি গণতান্ত্ৰিক প্ৰতিবাদী কণ্ঠ তাক ৰোধ কৰাৰ এক অভিপ্ৰায়, অসমৰ মানুহে তেওঁলোকৰ এই উদ্দেশ্য ভালদৰে বুজি উঠিছে’।
অসমৰ মুখ্য মন্ত্ৰী সৰ্বানন্দ সোণোৱালে, যি এসময়ত আছুৰ শীৰ্ষ নেতা আছিল, এই সম্পৰ্কত এক সহানুভূতিশীল মনোভাৱ দেখুৱাই বন্দী নেতাকেইজনক মুকলি কৰি দিয়া উচিত বুলি তেওঁ লগতে কয়।
উল্লেখযোগ্য যে ২০১৯ চনৰ ১২ ডিচেম্বৰত যোৰহাট আৰক্ষীয়ে অখিল গগৈক গ্ৰেপ্তাৰ কৰি পিছত NIAক গতাই দিছিল। তেওঁৰ ওপৰত মাওবাদীৰে সম্পৰ্ক, ৰাষ্ট্ৰদ্ৰোহ আদি বিভিন্ন গোচৰ আছে।
