নগাঁও সদৰ আৰক্ষী থানাৰ অন্তৰ্গত ইটাচালি আৰক্ষী চকীৰ উপ-পৰিদৰ্শকৰ তত্ত্বাৱধানত আজি নগাঁও আৰক্ষীৰ এটা বিশেষ অভিযানকাৰী দলে এক অভিযান চলাই নগাঁও চহৰৰ নিকটৱৰ্তী ম’হখুলিৰ পৰা এজন ড্ৰাগছ মাফিয়াক গ্ৰেপ্তাৰ কৰে।
দীৰ্ঘদিন ধৰি পলাতক হৈ থকা ধৃত ড্ৰাগ মাফিয়াজন লোকমান হুছেইন ওৰফে লোকমান আলী বুলি আৰক্ষী সূত্ৰই জানিব দিয়ে। ইতিমধ্যে নগাঁও সদৰ আৰক্ষী থানাত লোকমান আলীৰ বিৰুদ্ধে ২৪৩/১৮ নম্বৰত আৰু ২২(চি) এন দি পি এচ আইনৰ অধীনত এটা গোচৰ পঞ্জীভূক্ত হৈ আছে। এই গোচৰৰ ভিত্তিতে আৰক্ষীয়ে লোকমান আলীক গ্ৰেপ্তাৰ কৰিছে।
জানিব পৰা মতে ধৃত লোকমান আলীৰ পৰা ৪০০০ বটল ক’ফ চিৰাপ আৰু ১৮০০০ হেজাৰ নিচাযুক্ত টেবলেট উদ্ধাৰ কৰে।
ইফালে নগাঁও আৰক্ষীয়ে ধৃত ড্ৰাগছ মাফিয়া লোকমান আলীক আদালতত হাজিৰ কৰোৱাই যদিও আদালতে ৭ দিনৰ বাবেহে আৰক্ষীৰ জিন্মাত দিয়ে। বৰ্তমান আৰক্ষীয়ে ধৃত মাফিয়াজনৰ পৰা অধিক তথ্য সংগ্ৰহৰ বাবে সোধা-পোচা অব্যাহত ৰখা বুলি জানিব পৰা গৈছে।
আনহাতে, জিলাখনত অবৈধভাৱে চলি থকা বিভিন্ন ধৰণৰ ড্ৰাগছ তথা নিচাযুক্ত ঔষধৰ অবাধ বেহা সন্দৰ্ভত ঔষধ পৰিদৰ্শক জ্ঞাত যদিও তেওঁ গ্ৰহণ কৰা নীৰৱ ভূমিকাই এতিয়া সকলোকে সন্দেহৰ মাজলৈ ঠেলি দিছে।
