বাল্য বিবাহ যে এক সামাজিক ব্যাধি সেই সম্পৰ্কে আমাৰ মাজত কোনো দ্বিমত নাই। কোনো যুৱক-যুৱতীয়ে যদি বিবাহযোগ্য সময়ৰ আগতে বিয়া পাতিব বিচাৰে তেওঁলোকৰ পৰিয়ালৰ মানুহ, অভিভাৱক, বন্ধু-বান্ধৱ বা ওচৰ-চুবুৰীয়াই তাত বাধা দিয়া উচিত। বাল্য বিবাহ বন্ধ কৰাৰ বাবে আইনৰ প্ৰয়োজন নিশ্চয় আছে। কিন্তু কেৱল আইন প্ৰণয়ন কৰিয়ে বাল্য বিবাহ বন্ধ কৰিব পৰা নাযায়। যিবোৰ কথাৰ কাৰণে এতিয়াও আমাৰ সমাজত বাল্য বিবাহ চলি আছে, প্ৰথমে আমি সেইবোৰ চিনাক্ত কৰি উলিয়াব লাগিব। তাৰ প্ৰতিকাৰৰ ব্যৱস্থা কৰিলেহে আমাৰ মাজৰ পৰা বাল্য বিবাহ নোহোৱা হ’ব। কিন্তু বাল্য বিবাহ ৰোধ কৰাৰ নামত সম্প্ৰতি অসমত যি এক আতংকৰ সৃষ্টি কৰা হৈছে তাৰ উদ্দেশ্য কি?
যোৱা কিছুদিনৰ ভিতৰত হাজাৰ হাজাৰ লোকক বাল্য বিবাহৰ কাৰণে গ্ৰেপ্তাৰ কৰি জেললৈ পঠিওৱা হৈছে। এইখিনিতে আমাৰ মনত প্ৰশ্ন হয়। বাল্য বিবাহৰ কাৰণে যে ইমানবোৰ মানুহক গ্ৰেপ্তাৰ কৰা হৈছে তাৰ মূল উদ্দেশ্য কি? এই ক্ষেত্ৰত কিবা নীতি-নিয়ম মানি চলা হৈছেনে? কেতিয়া বাল্য বিবাহ কৰা লোকক গ্ৰেপ্তাৰ কৰা হৈছে? তাৰ কিবা সময়-সীমা আছে নে নাই? বাল্য বিবাহৰ লগত জড়িত সকলক গ্ৰেপ্তাৰ কৰোঁতে কিবা জাত-পাত বা সম্প্ৰদায়ৰ বাচ-বিচাৰ কৰা হৈছে নেকি? আনহাতে কিবা কাৰণে বাল্য বিবাহ কৰা পুৰুষজনক বিচাৰি উলিয়াব নোৱাৰিলে তেওঁৰ পৰিয়ালৰ অন্য মানুহক গ্ৰেপ্তাৰ কৰা হৈছে নেকি?
বাল্য বিবাহৰ নামত ইমানবোৰ মানুহক যে গ্ৰেপ্তাৰ কৰা হৈছে তাৰ মূল উদ্দেশ্য বাল্য বিবাহ বন্ধ কৰা বুলি আমাৰ মনে নধৰে। কিয়নো, কি নীতিৰ ভিত্তিত এই মানুহবোৰক গ্ৰেপ্তাৰ কৰা হৈছে সেইটো এতিয়াও স্পষ্ট নহয়। কিমান বছৰ আগতে বাল্য বিবাহ কৰা লোকক গ্ৰেপ্তাৰ কৰা হৈছে, সেইটো কোৱা হোৱা নাই। কিন্তু ‘বাল্য বিবাহ প্ৰতিৰোধ আইন ২০০৬’(Prohibition Of Child Marriage Act, 2006) আৰু ‘যৌন অপৰাধৰ পৰা শিশুক সুৰক্ষা প্ৰদান আইন ২০১২’ (Protection of Children From Sexual Offences Act, 2012) ৰ ভিত্তিত যিহেতু মানুহবোৰক গ্ৰেপ্তাৰ কৰা হৈছে, আমি পৰোক্ষভাবে ২০০৬চনকে গ্ৰেপ্তাৰৰ সময় সীমা বুলি ধৰি ল’ব পাৰোঁ। তাৰমানে আজিৰ পৰা ১৭ বছৰ আগেয়ে বাল্য বিবাহ কৰা লোককো চৰকাৰে এই আইনৰ অধীনত গ্ৰেপ্তাৰ কৰিব পাৰে।
আজিৰ পৰা ১৭ বছৰ আগতে বিয়া কৰোৱা লোকক যদি এই আইনৰ অধীনত গ্ৰেপ্তাৰ কৰা হয়, ১৭ বছৰ কিয় পাঁচ বছৰ আগতে বিয়া হোৱা আৰু ল’ৰা-ছোৱালী জন্ম দিয়া লোককো যদি এই আইনৰ অধীনত গ্ৰেপ্তাৰ কৰা হয়, সি জানো পৰিয়ালটোলৈ এক হাহাকাৰ নমাই নানিব? এনেকুৱা খবৰো ওলাইছে যে বাল্য বিবাহ কৰোৱা ল’ৰাক নাপায় বয়সীয়া দেউতাকক গ্ৰেপ্তাৰ কৰি আনি পুলিচ থানাত ৰখা হৈছে। এইবোৰ আইন সন্মত কথা হয়নে? বাল্য বিবাহ মূলতঃ যিহেতু এটা সামাজিক ব্যাধি, যিবোৰ সম্প্ৰদায়ৰ মানুহ সাধাৰণতে শিক্ষা বা সংস্কাৰৰ পৰা দূৰৈত থাকে, আৰু যিবোৰ সম্প্ৰদায়ৰ মানুহ আৰ্থ-সামাজিকভাবে পিছপৰা সেইবোৰ মানুহৰ মাজতে বেছিকৈ বাল্য বিবাহৰ প্ৰচলন দেখা যায়। অসমত সেই সম্প্ৰদায় সমূহ হ’ল প্ৰধানকৈ সংখ্যালঘু পমুৱা মুছলমান, চাহ জনগোষ্ঠী আৰু জনজাতীয় লোক সকল। বাল্য বিবাহত লিপ্ত লোক সকলক গ্ৰেপ্তাৰ কৰাৰ সময়ত এই সমূহ জনগোষ্ঠীৰ লোককেই বেছিকৈ গ্ৰেপ্তাৰ কৰা হৈছিল।
কিন্তু তাক লৈ গোটেইখন জাঙুৰ খাই উঠোঁতে, হঠাত জনগোষ্ঠীয় লোক সকল আৰু চাহ জনগোষ্ঠীৰ লোক সকলৰ প্ৰতি প্ৰশাসনৰ দৃষ্টিভংগী যেন কিছু শিথিল হ’ল। তেওঁলোকক জামিন দিয়াৰ ব্যৱস্থা কৰিলে। এতিয়া চৰকাৰৰ লক্ষ্য যেন কেৱল সংখ্যালঘু পমুৱা মুছলমান সকলহে হৈ পৰিল। ইয়াৰ কাৰণ দুটাঃ আগতে উল্লেখ কৰা ধৰণে আৰ্থ-সামাজিক কাৰণতে পমুৱা মুছলমান সকলৰ মাজত শিক্ষিত লোকৰ সংখ্যা কম আৰু জনসংখ্যা বৃদ্ধিৰ হাৰ বেছি। কিন্তু জনগোষ্ঠীটোৰ মাজত শিক্ষাৰ প্ৰতি ধাউতি বাঢ়ি অহাৰ লগে লগে তেওঁলোকৰ মাজত জনসংখ্যা বৃদ্ধিৰ হাৰো এতিয়া আগৰ তুলনাত কমি আহিছে। পিছে, বিজেপি চৰকাৰে ৰাজনৈতিক স্বাৰ্থতে সদায় মুছলমানৰ আগ্ৰাসনৰ কথা কৈ আহিছে।
তেওঁলোকে অনবৰতে কৰি থকা প্ৰচাৰ হ’ল- কম বয়সতে বিয়া কৰাই এপালমান ল’ৰা-ছোৱালী জন্ম দি ‘মিঞা’ই ওৰফে ‘মোগলে’ ‘আমাৰ হিন্দু সকলক’ সংখ্যালঘু কৰাৰ ষড়যন্ত্ৰত নামিছে। গতিকে ‘মিঞা’ৰ জনসংখ্যা বৃদ্ধি বন্ধ কৰাবই লাগিব। জোৰ-জবৰদস্তি কৰি হ’লেও ‘মিঞা’ৰ মাজত বাল্য বিবাহ বন্ধ কৰাব লাগিব। আচলতে ‘মিঞা’ৰ মাজত বাল্য বিবাহ বন্ধ হোৱা নোহোৱাটো ডাঙৰ কথা নহয়। তেনে জোৰদাৰ উদ্যোগ এটা লোৱা দেখুৱাই সাধাৰণ হিন্দু মানুহৰ মাজত এনে এটা মনোভাব সৃষ্টি কৰিব লাগিব যে ‘বিজেপিৰ চৰকাৰখন হিন্দুৰ স্বাৰ্থত কাম কৰা চৰকাৰ। যি পৰিস্থিতিয়ে নাহক কিয় আমি সদায় এই চৰকাৰৰ পক্ষে থাকিব লাগিব। এওঁলোকৰ পক্ষে নিৰ্বাচনত ভোট দিব লাগিব। ’ গতিকে বাল্য বিবাহকলৈ কৰা হুলস্থূলৰ মূল উদ্দেশ্য হ’ল হিন্দু ভোট ধৰি ৰখা।
