বিশ্বৰ নেতাসকলে এতিয়াও জলবায়ু পৰিবৰ্তনে কঢ়িয়াই অনা ভাবুকিসমূহ উলাই কৰি আহিছে।
পৰিৱেশ সুৰক্ষা কৰ্মী গ্ৰেটা থানবাৰ্গে মঙলবাৰে এইদৰে কয়।
গ্ৰেটাৰ নিজা দেশ চুইডেনৰ প্ৰধানমন্ত্ৰী ষ্টেফান লফভেনৰ স’তে এখন বৈঠকৰ অন্তত পৰিৱেশ সুৰক্ষা কৰ্মীগৰাকীয়ে সাংবাদিকৰ আগত এইদৰে কয়।
গ্ৰেটাই কয় যে ক্ষমতাত অধিষ্ঠিত ৰাজনৈতিক নেতাসকলৰ স’তে তেওঁ বহুকেইবাৰ বৈঠকত বহিছে আৰু বৈঠকসমূহত একেধৰণৰে আলোচনা হয়- যিসমূহ আলোচনা শেষত উলাই কৰা হয়।
”যদিহে ক্ষমতাত অধিষ্ঠিত হৈ থকাসকলক কোনেও হেঁচা প্ৰদান নকৰে, এয়া নিশ্চিত যে তেওঁলোকে একো কৰিব নিবিচাৰে।”- তেওঁ কয়।
উল্লেখযোগ্য যে জলবায়ু পৰিবৰ্তনক লৈ চৰকাৰে কোনো ব্যৱস্থা নোলোৱাৰ প্ৰতিবাদত ২০১৮ চনত প্ৰতিবাদত বহাৰ পাছতেই সেই সময়ত এগৰাকী স্কুলীয়া ছাত্ৰী গ্ৰেটা থানবাৰ্গে বাতৰিৰ শিৰোনামা দখল কৰিছিল।
পাছলৈ গ্ৰেটাই বিশ্বৰ বিভিন্ন বিষয়ত মাত মাতি আহিছে।