বিৰোধী সাংসদসকলৰ তীব্ৰ বিৰোধিতাৰ পিছতো দেওবাৰে গৃহীত হ’ল দুখন কৃষি বিধেয়ক। বিধেয়কৰ বিৰোধিতা কৰিবলৈ গৈ আঠগৰাকী বিৰোধী সাংসদ চলিত অধিৱেশনৰ পৰা নিলম্বিত হ’বলগীয়াও হ’ল।
ইয়াৰ মাজতে বলিউড অভিনেতা অনুপম খেৰে কৃষি বিধেয়ক সন্দৰ্ভত মোদী নেতৃত্বাধীন কেন্দ্ৰীয় চৰকাৰৰ সপক্ষে ঠিয় দিছে।
অভিনেতা খেৰে টুইটযোগে কয় যে কৃষি বিধেয়কে কৃষকৰ অৱস্থা উন্নত কৰাৰ লগতে তেওঁলোকক আত্মনিৰ্ভৰ কৰিব।
তেওঁ কয়, “যোৱা ৭০ বছৰত কৃষকসকলৰ অৱস্থা চিন্তনীয় হৈ পৰিছে। কিন্তু এতিয়া এই বিধেয়কৰ বাবে তেওঁলোকৰ অৱস্থা সলনি হৈ যাব। কৃষকসকল এতিয়া মালিক হৈ গ’ল। কৃষকসকল আন্তনিৰ্ভৰ হ’ব লাগে”।
উল্লেখ্য যে পঞ্জাৱ, হাৰিয়ানাৰ লগতে আন আন ৰাজ্যসমূহত কৃষকসকলে ৰাজপথলৈ ওলাই আহি এই বিধেয়কৰ তীব্ৰ বিৰোধিতা কৰি আছে।
ইফালে প্ৰধান মন্ত্ৰী নৰেন্দ্ৰ মোদীয়ে কৃষকসকলক কেইবাবাৰো প্ৰতিশ্ৰুতি দিছে যে এই বিধেয়কৰ জৰিয়তে নূন্যতম সমৰ্থন মূল্য (এম এছ পি) আঁতৰাই দিয়া নহয়।
কিন্তু কৃষকসকলৰ মনৰ পৰা এই সন্দেহ আঁতৰা নাই।
উল্লেখ্য যে দেওবাৰে দুখন কৃষি বিধেয়ক গৃহীত কৰাক লৈ ৰাজ্যসভা উত্তপ্ত হৈ পৰিছিল।
কেইগৰাকীমান সাংসদে অধ্যক্ষৰ ডেস্কৰ মাইক্ৰ’ফোন ভাঙি পেলোৱাৰ লগতে উপাধ্যক্ষৰ কাষত থিয় হৈ কাগজ ফালি পেলোৱাৰ দৃশ্যও কেমেৰাত ধৰা পৰিছিল।
এই আক্ৰমণৰ ঘটনাৰ সৈতে জড়িত বিৰোধী দলৰ ৮গৰাকী সাংসদক আজি এসপ্তাহৰ বাবে নিলম্বন কৰে।