কথা বা সামাজিক মাধ্যমৰ পোষ্টৰ যে এক গভীৰ প্ৰভাৱ থাকে, সেই কথা এতিয়া ভালদৰেই মৰ্মে মৰ্মে উপলব্ধি কৰিছে টলিউডৰ জনপ্ৰিয় অভিনেতা পৰমব্ৰত চেটাৰ্জীয়ে। ২০২১ চনৰ পশ্চিমবংগ বিধানসভা নিৰ্বাচনৰ ফলাফল ঘোষণাৰ দিনা কৰা এটা পুৰণি টুইটক কেন্দ্ৰ কৰি এতিয়া আইনী মেৰপেচত পৰিছে অভিনেতাগৰাকী। তেওঁৰ লগতে অভিনেত্ৰী স্বস্তিকা মুখাৰ্জীৰ বিৰুদ্ধেও কলকাতাৰ গড়িয়াহাট থানাত এটা এজাহাৰ ৰুজু কৰা হৈছে। এই পুৰণি পোষ্টটোৱে বৰ্তমানৰ সলনি হোৱা ৰাজনৈতিক প্ৰেক্ষাপটত দুয়োগৰাকী তাৰকাৰ বাবে ডাঙৰ সমস্যা কঢ়িয়াই আনিছে।
প্ৰাপ্ত তথ্য অনুসৰি, ২০২১ চনৰ নিৰ্বাচনৰ ফলাফল ওলোৱাৰ দিনা যেতিয়া তৃণমূল কংগ্ৰেছৰ জয় নিশ্চিত হৈছিল, তেতিয়া পৰমব্ৰত চেটাৰ্জীয়ে সামাজিক মাধ্যমত লিখিছিল যে আজিৰ দিনটোক বিশ্ব ৰোগৰানি দিৱস অৰ্থাৎ প্ৰহাৰ কৰা দিন হিচাপে ঘোষণা কৰা হওক। এই পোষ্টটোৰ উত্তৰত অভিনেত্ৰী স্বস্তিকা মুখাৰ্জীয়ে হাঁহিৰ ইম’জি ব্যৱহাৰ কৰি সমৰ্থন জনাইছিল। অধিবক্তা জয়দীপ সেনে দাখিল কৰা অভিযোগনামাত কোৱা হৈছে যে এই পোষ্ট আৰু মন্তব্যই সেই সময়ত হোৱা নিৰ্বাচন পৰৱৰ্তী হিংসাত্মক ঘটনাবোৰক উচতনি দিছিল, যাৰ ফলত বিৰোধী দলৰ কৰ্মীসকলৰ ওপৰত আক্ৰমণৰ দৰে ঘটনা সংঘটিত হৈছিল।
এই ঘটনাৰ পিছতে কলকাতা আৰক্ষীয়ে স্বস্তিকা মুখাৰ্জীক থানাত প্ৰায় এঘণ্টা ধৰি জেৰা কৰে। ইফালে সম্ভাৱ্য গ্ৰেপ্তাৰৰ পৰা বাচিবলৈ পৰমব্ৰত চেটাৰ্জীয়ে কলকাতা উচ্চ ন্যায়ালয়ৰ দ্বাৰস্থ হয়। উচ্চ ন্যায়ালয়ে অভিনেতাজনক কিছু পৰিমাণে সকাহ দি অহা চাৰি সপ্তাহৰ বাবে তেওঁৰ বিৰুদ্ধে কোনো কঠোৰ ব্যৱস্থা গ্ৰহণ নকৰিবলৈ আৰক্ষীক নিৰ্দেশ দিছে। অৱশ্যে ইয়াৰ বাবে তেঁও আৰক্ষীৰ তদন্তত সম্পূৰ্ণ সহযোগিতা কৰিব লাগিব বুলি আদালতে স্পষ্ট কৰি দিছে।
আনহাতে পৰমব্ৰতৰ পত্নী পিয়া চক্ৰৱৰ্তীয়ে এই অভিযোগ নাকচ কৰি কয় যে ৰোগৰানি শব্দটো প্ৰথমে এজন বিজেপি নেতাই শিল্পীসকলক ধমকি দিবলৈ ব্যৱহাৰ কৰিছিল আৰু পৰমব্ৰতে কেৱল তাৰ ওপৰত এটা ব্যংগাত্মক পোষ্টহে কৰিছিল। কিন্তু ৰাজনৈতিক মহল আৰু বিজেপি নেতৃত্বই এই গৰাকী অভিনেতাক তীব্ৰ সমালোচনা কৰি সুযোগসন্ধানী বুলি অভিহিত কৰিছে। ৰাজনৈতিক পৰিৱেশ সলনি হোৱাৰ বাবে অভিনেতাজনে নিজৰ সন্তানৰ দোহাই দি স্থিতি সলনি কৰা বুলিও একাংশই অভিযোগ উত্থাপন কৰিছে।
