কৰ্ণাটকৰ এগৰাকী চলচ্চিত্ৰ পৰিচালকক প্ৰহাৰ কৰাৰ অভিযোগ উঠিছে। তেওঁক অপহৰণ কৰি ক্ৰিকেট ষ্টাম্প আৰু হকী ষ্টিকেৰে প্ৰহাৰ কৰাৰ অভিযোগ উত্থাপন হৈছে। টি এ অনিশ নামৰ কানাড়া চলচ্চিত্ৰ পৰিচালকগৰাকীক মাৰপিট কৰাৰ অভিযোগত গ্ৰেপ্তাৰ কৰা হৈছে এঘাৰজন লোকক।
বেংগালুৰু আৰক্ষীয়ে জনোৱা মতে, বৃহস্পতিবাৰে তেওঁলোকক গ্ৰেপ্তাৰ কৰা হয়। গ্ৰেপ্তাৰ হোৱাসকলৰ ভিতৰত এগৰাকী অভিনেত্ৰীও আছে। আৰক্ষী সূত্ৰৰ পৰা জানিব পৰা মতে, বিত্তীয় লেনদেনৰ বিবাদৰ বাবেই টি এ অনিশক প্ৰহাৰ কৰা হয়।
জানিব পৰা মতে, টি এ অনিছে যোৱা ১১ ফেব্ৰুৱাৰীত আডুগোডী থানাত এজাহাৰ দাখিল কৰিছিল।পৰিচালনাৰ উপৰিও তেওঁৰ সোণৰ গহনা আৰু নগদ ৩০ হাজাৰ টকা লুটি নিয়াৰ অভিযোগ কৰে পৰিচালকগৰাকীয়ে। মুকলি কৰি দিয়াৰ পূৰ্বে তেওঁক কেইবাটাও স্থানলৈ লৈ যোৱা হৈছিল।
বাতৰি অনুসৰি, অনিশে অলপতে বেংগালুৰুৰ পৰা মুম্বাইলৈ গুচি আহিছিল যদিও তেওঁৰ গাড়ী বিক্ৰী কৰিবলৈ এগৰাকী অভিনেত্ৰীৰ সৈতে যোগাযোগ ৰখা বুলি আৰক্ষীক জনাইছিল। ইন্দিৰানগৰত থকা সময়ৰ পৰাই তেওঁ অভিনেত্ৰীগৰাকীক চিনি পাইছিল।
কানাড়া পৰিচালকগৰাকীয়ে দাবী কৰিছে যে তেওঁক গাড়ীখন বিক্ৰী কৰাত সহায় কৰাৰ নামত মাতিছিল। তদুপৰি ৯ ফেব্ৰুৱাৰীত আডুগোডি অঞ্চলৰ পৰা অপহৰণ কৰি ব্যাদাৰাহল্লীলৈ লৈ গৈ এটা কোঠাত আবদ্ধ কৰি মাৰপিট আৰু নিৰ্যাতনৰ অভিযোগ উত্থাপন কৰে। পিছত অনিশক বলপূৰ্বকভাৱে পণ্ডিতনাহল্লীৰ ওচৰৰ মন্দৰগিৰি পাহাৰলৈ লৈ যোৱা হয়।
আৰক্ষীয়ে জনোৱা মতে, অভিযোগৰ ভিত্তিত ঐশ্বৰ্য ওৰফে এছ মেলো নামৰ এগৰাকী অভিনেত্ৰীকে ধৰি ১১জন লোকক গ্ৰেপ্তাৰ কৰা হৈছে। বৃহস্পতিবাৰে আটক কৰা লোকসকলক আদালতত হাজিৰ কৰোৱা হয়। আদালতে তেওঁলোকক ন্যায়িক জিম্মাত ৰখাৰ নিৰ্দেশ দিছে।
কিন্তু প্ৰাৰম্ভিক তদন্তৰ অন্তত আৰক্ষী বিষয়াসকলে কয় যে মুক্তি নোপোৱা এখন ছবিক লৈ অনিশৰ সৈতে এজন বিনিয়োগকাৰীৰ আৰ্থিক বিবাদ হৈছিল। এই বিবাদৰ বাবেই বিনিয়োগকাৰীৰ এজন ঘনিষ্ঠ সহযোগীয়ে অনিশক হাৰাশাস্তি কৰাৰ ষড়যন্ত্ৰ ৰচনা কৰিছিল বুলিও জানিব পৰা গৈছে। এই সন্দৰ্ভত তদন্ত চলি আছে।
