কিছুদিন পূৰ্বে মুকেশ আম্বানীৰ অঁতৰাই তেওঁ এছিয়াৰ আটাইতকৈ ধনী ব্যক্তি হিচাপে পৰিগণিত হৈছিল। এতিয়া গৌতম আদানীৰ সম্পত্তিৰ আশ্চৰ্যজনক তথ্য ৰাজহুৱা হৈছে। পৰিসংখ্যা অনুসৰি আদানী পাৱাৰ লিমিটেডৰ লাভে ৪ হাজাৰ কোটিৰ সীমা অতিক্ৰম কৰিছে।
যোৱা বছৰৰ এপ্ৰিল মাহত আদানী পাৱাৰৰ লাভ আছিল ২৫৯৯ কোটি টকা। চলিত বৰ্ষৰ এপ্ৰিল মাহত সেই সংখ্যা ৪,২৭১ কোটিত উপনীত হয়। অৰ্থাৎ এবছৰত আদানী পাৱাৰৰ লাভ ৬৪ শতাংশ বৃদ্ধি পাইছে।
চলিত মাহৰ মাজভাগত আদানী গ্ৰুপৰ শ্বেয়াৰৰ মূল্য দ্ৰুতগতিত বৃদ্ধি পাইছে। ইয়াৰ বাবেই আদানীয়ে এছিয়াৰ আটাইতকৈ ধনী ব্যক্তি হিচাপে পৰিগণিত হৈছে। উদ্যোগপতিগৰাকীৰ মুঠ ধন-সম্পত্তি ৯২.৬ বিলিয়ন ডলাৰ অৰ্থাৎ ৮ লাখ ৭৭ হাজাৰ কোটি টকা।
আদানীৰ বিভিন্ন ব্যৱসায়ৰ ভিতৰত অন্যতম হৈছে বিদ্যুৎ যোগান কেন্দ্ৰ আদানী পাৱাৰ। আদানীৰ এই কোম্পানীটোৱে যোৱা বিত্তীয় বৰ্ষত মুঠ ১৫ হাজাৰ কোটি টকা উপাৰ্জন কৰিছে। সেয়াও যোৱা বছৰৰ তুলনাত ১০০০ কোটিৰো অধিক। এই বৃহৎ লাভৰ আঁৰৰ কাৰণ হ’ল কৰ হাৰ হ্ৰাস, যিটো খোদ কোম্পানীটোৱেও স্পষ্টভাৱে উল্লেখ কৰিছে। মন কৰিবলগীয়া যে আদানী পাৱাৰ হৈছে সৰ্ববৃহৎ ব্যক্তিগত তাপ শক্তি উৎপাদন কেন্দ্ৰ।
প্ৰসংগক্ৰমে বিৰোধীয়ে বাৰে বাৰে মোডী চৰকাৰক আদানীক সুবিধা দিয়াৰ অভিযোগ উত্থাপন কৰি আহিছে। দুবছৰ পূৰ্বে আমেৰিকাৰ শ্বৰ্ট চেলাৰ প্ৰতিষ্ঠান হিণ্ডেনবাৰ্গ ৰিচাৰ্চে দাবী কৰিছিল যে আদানী গ্ৰুপে নিজৰ সুবিধাৰ বাবে ভাৰতীয় বজাৰত বিভিন্ন ধৰণে প্ৰভাৱ পেলাইছে।
হিণ্ডেনবাৰ্গ গৱেষণাই মোদীৰ শাসন কালত আদানী গ্ৰুপৰ উত্থানত বৃহৎ দুৰ্নীতিৰ ইংগিত দিছিল। সেই প্ৰতিবেদন ওলোৱাৰ লগে লগে আদানীসকলৰ শ্বেয়াৰৰ মূল্য হোৰাহোৰে নামিবলৈ ধৰে। আদানীৰ বিৰুদ্ধে মূল অভিযোগ আছিল বজাৰক প্ৰভাৱিত কৰা আৰু একাউণ্টত জালিয়াতি কৰা। অৱশ্যে সেই অভিযোগ খাৰিজ কৰিছে ছেবিয়ে।
ছেবিৰ প্ৰতিবেদনৰ পিছৰে পৰা আদানীৰ সম্পত্তিৰ পৰিমাণ ক্ৰমান্বয়ে বৃদ্ধি পাইছে। শেহতীয়াকৈ পুনৰ বাংলাদেশলৈ বিদ্যুৎ যোগান আৰম্ভ কৰিছে আদানী পাৱাৰে। ভাৰতৰ আদানী পাৱাৰ কোম্পানীয়ে ২০১৭ চনত বাংলাদেশৰ সৈতে চুক্তিবদ্ধ হৈছিল।
চুক্তি অনুযায়ী আদানীৰ কোম্পানীয়ে ঝাৰখণ্ডৰ গোড্ডাত অৱস্থিত বিদ্যুৎ উৎপাদন কেন্দ্ৰৰ পৰা অহা ২৫ বছৰলৈ ঢাকালৈ ১০০ শতাংশ বিদ্যুৎ যোগান ধৰাৰ কথা। এতিয়া বাংলাদেশত নতুন চৰকাৰ গঠন হোৱাৰ পিছৰে পৰা আদানীৰ কোম্পানীয়ে তাত বিদ্যুৎ যোগান অব্যাহত ৰাখিছে।
