ৰাজ্যৰ দুখীয়া মেধাৱী শিক্ষাৰ্থীলৈ সুখবৰ কঢ়িয়াই আনিছে অন্যতম আগশাৰীৰ কোচিং চেন্টাৰ “এফিনিটি ক্লাচেচ”এ ৷ আৰ্থিক ক্ষেত্ৰত দুৰ্বল পৰিয়ালৰ মেধাৱী ছাত্ৰ ছাত্ৰীক চিকিৎসক, অভিযন্তা কৰাৰ লক্ষ্যৰে কোচিং চেন্টাৰটোৱে সম্পূৰ্ণ বিনামূলীয়া শিক্ষা প্ৰদান কৰিব ৷ এই কথা জানিবলৈ দিয়ে শিক্ষা প্ৰতিষ্ঠানখনৰ মুখ্য কাৰ্যবাহী বিষয়া অংকিত আগৰৱালাই ৷
গুৱাহাটীৰ ৰাজগড়ত প্ৰতিষ্ঠানখনৰ দ্বিতীয়টো শাখা মুকলি কৰি শুকুৰবাৰে আগৰৱালাই সংবাদ মাধ্যমক জনায় যে, আৰ্থিক ক্ষেত্ৰত দুৰ্বল পৰিয়ালৰ মেধাৱী ছাত্ৰ ছাত্ৰীসকলেও যাতে চিকিৎক, অভিযন্তা হ’ব পাৰে সেই উদ্দেশ্যে “এফিনিটি ক্লাচেচ”ৰ তৰফৰ পৰা বিশেষ পদক্ষেপ গ্ৰহণ কৰা হৈছে ৷
“বি পি এল” পৰিয়ালৰ মেধাৱী ছাত্ৰ-ছাত্ৰীক “এফিনিটি ক্লাচেচ”এ সম্পূৰ্ণ বিনামূলীয়াকৈ প্ৰশিক্ষণ প্ৰদান কৰিব বুলি বিষয়া গৰাকীয়ে জানিবলৈ দিয়ে৷ বৰ্তমান প্ৰতিষ্ঠানখনত চাৰি শতাধিক শিক্ষাৰ্থীয়ে প্ৰশিক্ষণ গ্ৰহণ কৰি থকা বুলি উল্লেখ কৰি চলিত বৰ্ষত অৰ্ধ শতাধিকক সৰ্বভাৰতীয় পৰ্যায়ৰ পৰীক্ষাত স্থান দখল কৰাৰ লক্ষ্য গ্ৰহণ কৰা বুলিও লগতে বিষয়াগৰাকীয়ে জনায়৷
শদিয়াৰ পৰা ধুবুৰীলৈ শিক্ষা প্ৰতিষ্ঠানখনৰ জনপ্ৰিয়তা বৃদ্ধি কৰাৰ লগতে শিক্ষাৰ ক্ষেত্ৰত পিছপৰা অঞ্চলসমূহৰ মেধাৱী ছাত্ৰ-ছাত্ৰীক সৰ্বভাৰতীয় পৰ্যায়ৰ পৰীক্ষাৰ প্ৰতি আকৰ্ষিত কৰাৰ বাবে বিশেষ কাৰ্যসূচী গ্ৰহণ কৰা বুলি প্ৰতিষ্ঠানখনৰ জনসম্পৰ্কৰক্ষী বিষয়া গুণীন নাথে জানিবলৈ দিয়ে ৷