জম্মু-কাশ্মীৰত নব্বৈৰ দশকত কাশ্মীৰী পণ্ডিতসকলক লক্ষ্য কৰি সংঘটিত হোৱা হত্যাকাণ্ডসমূহৰ তদন্ত পুনৰ আৰম্ভ কৰিব ষ্টেট ইনভেষ্টিগেচন এজেন্সী, অৰ্থাৎ এছআইএ-য়ে। ১৯৯৮ চনত সংঘটিত হোৱা ভয়ংকৰ ৱান্ধামা গণহত্যাৰ গোচৰটো ২৬ বছৰৰ পাছত পুনৰ খুলি নতুনকৈ তদন্ত আৰম্ভ কৰিছে তদন্তকাৰী সংস্থাটোৱে। একে সময়তে কাশ্মীৰী পণ্ডিত নেতা টিকা লাল টাপলু আৰু ন্যায়াধীশ নীলকণ্ঠ গঞ্জুৰ হত্যাকাণ্ডৰ তদন্তও অধিক সক্ৰিয় কৰি তোলা হৈছে।
১৯৯৮ চনৰ ২৫ জানুৱাৰীত গান্দেৰবল জিলাৰ ৱান্ধামা গাঁৱত সশস্ত্ৰ জংগীয়ে প্ৰৱেশ কৰি কাশ্মীৰী পণ্ডিত পৰিয়ালসমূহক লক্ষ্য কৰি আক্ৰমণ চলাইছিল। অমানৱীয় গুলীচালনাত ৯গৰাকী মহিলা আৰু ৪টা শিশুসহ মুঠ ২৩জন নিৰীহ লোক নিহত হৈছিল। ইমান বছৰ পাৰ হৈ যোৱাৰ পাছতো এই হত্যাকাণ্ডৰ ৰহস্য সম্পূৰ্ণৰূপে উদঘাটন হোৱা নাছিল। এতিয়া এছআইএ-য়ে পুনৰ তদন্ত আৰম্ভ কৰি ঘটনাৰ সৈতে জড়িত জংগী আৰু স্থানীয়ভাৱে সহায় কৰা লোকসকলক চিনাক্ত কৰাৰ চেষ্টা চলাইছে।
ইয়াৰ পূৰ্বে কাশ্মীৰী পণ্ডিত নাৰ্ছ সৰলা ভাট হত্যাকাণ্ডৰ তদন্ততো এছআইএ-য়ে সক্ৰিয়তা বৃদ্ধি কৰিছিল। চলিত বছৰত এই গোচৰত এখন ৭৩৭ পৃষ্ঠাৰ অভিযোগনামা দাখিল কৰা হয়, য’ত কাৰাবন্দী জেকেএলএফ নেতা য়াছিন মালিকক মূল ষড়যন্ত্ৰকাৰী হিচাপে উল্লেখ কৰা হৈছে। কবি তথা সাহিত্যিক সৰ্বানন্দ কৌল প্ৰেমী আৰু তেওঁৰ পুত্ৰ বীৰেন্দ্ৰ কৌল হত্যাকাণ্ডৰ তদন্ততো উপত্যকাৰ বিভিন্ন স্থানত তালাচী চলোৱা হৈছিল।
এতিয়া পুৰণি আৰু বহুদিন ধৰি অমীমাংসিত হৈ থকা কাশ্মীৰী পণ্ডিত হত্যাকাণ্ডৰ গোচৰসমূহৰ ফাইল পুনৰ মেলি তদন্ত আগবঢ়াই নিয়া হৈছে। ১৯৮৯ চনৰ ছেপ্টেম্বৰ মাহত নিহত হোৱা বিশিষ্ট অধিবক্তা তথা তেতিয়াৰ জম্মু-কাশ্মীৰ বিজেপিৰ উপ-সভাপতি টিকা লাল টাপলুৰ হত্যাকাণ্ডও ইয়াৰ ভিতৰত অন্যতম। কাশ্মীৰ উপত্যকাত জংগীবাদৰ আৰম্ভণিৰ সময়ত সংঘটিত হোৱা লক্ষ্যভিত্তিক হত্যাকাণ্ডসমূহৰ ভিতৰত টাপলুৰ হত্যা অন্যতম গুৰুত্বপূৰ্ণ ঘটনা আছিল।
আনহাতে, জেকেএলএফৰ জংগী মকবুল ভাটক মৃত্যুদণ্ড দিয়া ন্যায়াধীশ নীলকণ্ঠ গঞ্জুৰ হত্যাকাণ্ডৰ তদন্ততো নতুনকৈ তৎপৰতা বৃদ্ধি কৰা হৈছে। ১৯৮৯ চনৰ ৪ নৱেম্বৰত শ্ৰীনগৰৰ হৰি সিং ষ্ট্ৰীটত দিনদুপৰতে তেওঁক গুলীয়াই হত্যা কৰা হৈছিল। দশকজুৰি অমীমাংসিত হৈ থকা এই হত্যাকাণ্ডসমূহৰ আঁৰত থকা জংগী, অপৰাধী আৰু তেওঁলোকক সহায় কৰা লোকসকলক আইনৰ আওতালৈ অনাই এতিয়া এছআইএ-ৰ মূল লক্ষ্য হৈ পৰিছে।
