দীঘলীয়া ৩৫ বছৰৰ সুদীৰ্ঘ অপেক্ষাৰ অন্তত অৱশেষত অন্ত পৰিল ১৯৯১ চনৰ ভয়ংকৰ জম্মু ৰেলৱে ষ্টেচন বোমা বিস্ফোৰণ গোচৰৰ। ১৯৯১ চনৰ সেই মর্মান্তিক আক্ৰমণত ৩ গৰাকী লোকৰ মৃত্যু হৈছিল আৰু প্ৰায় ১৮ জন লোক আহত হৈছিল। এই কাণ্ডৰ শেষৰজন পলাতক অভিযুক্ত আলতাফ হুছেইন শ্বেখক অৱশেষত ৰেল আৰক্ষীয়ে গ্ৰেপ্তাৰ কৰিবলৈ সক্ষম হৈছে। আলতাফ অনন্তনাগৰ মাৰহামা বিজবেহাৰাৰ বাসিন্দা আৰু নাজিৰ আহমেদ শ্বেখৰ পুত্ৰ। দক্ষিণ কাশ্মীৰত নিজৰ আচল পৰিচয় লুকুৱাই এজন ব্যৱসায়ীৰ ছদ্মৱেশত ইমান দিনে বসবাস কৰি আছিল সি। চলিত সপ্তাহৰ আৰম্ভণিতে অনন্তনাগৰ পৰা তাকে গ্ৰেপ্তাৰ কৰাৰ পিছত আদালতত হাজিৰ কৰোৱা হয় আৰু তাৰ বিৰুদ্ধে টাডা আইনৰ অধীনত গোচৰ ৰুজু কৰা হৈছে।
ঘটনাটো ঘটিছিল ১৯৯১ চনৰ ২ এপ্ৰিলত। সেইদিনা জম্মু ৰেলৱে ষ্টেচনৰ ১ নম্বৰ প্লেটফৰ্মত আলতাফ শ্বেখ আৰু তেওঁৰ সহযোগীসকলে এক শক্তিশালী বিস্ফোৰণ ঘটাইছিল। এই ভয়ংকৰ বিস্ফোৰণত অৰ্ধসামৰিক বাহিনীৰ দুজন জোৱান আৰু এজন সাধাৰণ নাগৰিকে প্ৰাণ হেৰুৱাইছিল। প্ৰাথমিক তদন্তত আমান উল্লাহ খান নামৰ এজন অভিযুক্তক গ্ৰেপ্তাৰ কৰিব পৰা গৈছিল যদিও আলতাফৰ লগতে বাকী তিনিজন লোকে আত্মগোপন কৰিছিল। পৰৱৰ্তী সময়ত বিশেষ আদালতে তেওঁলোকক পলাতক অপৰাধী বুলি ঘোষণা কৰে। কিন্তু আৰক্ষীয়ে হাৰ মনা নাছিল আৰু দুবছৰ পূৰ্বে গভৰ্নমেণ্ট ৰেলৱে পুলিচে তেওঁক বিচাৰি উলিয়াবলৈ পুনৰ বিশেষ অভিযান আৰম্ভ কৰে। কঠোৰ তল্লাচী আৰু পৰিচয় তথা বাসস্থানৰ তথ্যৰ সূক্ষ্ম অনুসন্ধানৰ পিছত অৱশেষত বিজবেহাৰাত তাৰ সন্ধান পোৱা যায়। এই গ্ৰেপ্তাৰৰ মাধ্যমেৰে কেন্দ্ৰীয় শাসিত অঞ্চলটোৰ অন্যতম পুৰণি এক সন্ত্ৰাসবাদী গোচৰৰ ইতি পৰিল।
জিআৰপিৰ এজন শীৰ্ষ বিষয়াৰ মতে, এই গ্ৰেপ্তাৰে এইটোকে পুনৰ প্ৰমাণ কৰিলে যে ন্যায় পাবলৈ পলম হ’ব পাৰে, কিন্তু ন্যায়ক কেতিয়াও অস্বীকাৰ কৰিব নোৱাৰি। আইনৰ দীঘল হাতৰ পৰা অপৰাধী কেতিয়াও সাৰি যাব নোৱাৰে। উল্লেখযোগ্য যে বৰ্তমান চৰকাৰে পুৰণি বহুকেইটা ডাঙৰ সন্ত্ৰাসবাদী গোচৰ পুনৰ তদন্ত কৰাৰ উদ্যোগ গ্ৰহণ কৰিছে। যাৰ ভিতৰত আছে ১৯৯০ চনত কাশ্মীৰী পণ্ডিত তথা কবি-গৱেষক সৰ্বানন্দ কৌল প্ৰেমী আৰু তেওঁৰ পুত্ৰ বীৰেন্দ্ৰ কৌলক অপহৰণ, চৰম নিৰ্যাতন আৰু মৰ্মান্তিকভাৱে হত্যা কৰাৰ ঘটনা। একাধাৰে কবি, সাংবাদিক, স্বাধীনতা সংগ্ৰামী আৰু সমাজ সংস্কাৰক সৰ্বানন্দ কৌলৰ হত্যাকাৰীক ইতিমধ্যে চিনাক্ত কৰা হৈছে বুলি সূত্ৰৰ পৰা জানিব পৰা গৈছে। ইয়াৰ উপৰিও এই তালিকাত আছে ১৯৯০ চনত শ্ৰীনগৰ চহৰত নাৰ্ছ সৰলা ভাটক অপহৰণ, ধৰ্ষণ আৰু হত্যা কৰাৰ দৰে অত্যন্ত সংবেদনশীল গোচৰো।
