এ আই ইউ ডি এফ মূৰব্বী তথা বিন্নাকান্দিৰ বিধায়ক বদৰুদ্দিন আজমলে সোমবাৰে অসম বিধানসভাত বিধায়ক হিচাপে শপত গ্ৰহণ কৰে। ইয়াৰ জৰিয়তে প্ৰায় দুটা দশকৰ পাছত তেওঁ পুনৰ ৰাজ্যৰ বিধানসভালৈ উভতি আহিল। অসম বিধানসভাৰ অধ্যক্ষ ৰঞ্জিত কুমাৰ দাসে তেওঁৰ চৰকাৰী কাৰ্যালয়ত আজমলক এই শপত বাক্য পাঠ কৰোৱায়। পৱিত্ৰ হজ যাত্ৰাৰ বাবে যোৱা মে’ মাহত অনুষ্ঠিত হোৱা সমূহীয়া শপত গ্ৰহণ অনুষ্ঠানত তেওঁ উপস্থিত থাকিব পৰা নাছিল। সোমবাৰৰ এই শপত গ্ৰহণ অনুষ্ঠানৰ সময়ত এ আই ইউ ডি এফৰ কেইবাগৰাকীও নেতা আৰু প্ৰাক্তন বিধায়ক আজমলৰ সৈতে উপস্থিত থাকে।
শপত গ্ৰহণৰ অন্তত সংবাদ মাধ্যমৰ আগত মত প্ৰকাশ কৰি বদৰুদ্দিন আজমলে কয় যে দলীয় আলোচনাৰ অন্ততহে তেওঁ ৰাজ্যিক ৰাজনীতিলৈ উভতি অহাৰ সিদ্ধান্ত লৈছিল। তেওঁ কয় যে মই ৰাজ্যিক ৰাজনীতিত সক্ৰিয়ভাৱে অংশগ্ৰহণ কৰা উচিত বুলি অনুভৱ কৰিছিলো আৰু দলৰ সিদ্ধান্ত মৰ্মে নিৰ্বাচনত অৱতীৰ্ণ হৈ ৰাইজৰ বিপুল সঁহাৰি লাভ কৰিবলৈ সক্ষম হওঁ। দেশৰ সাম্প্ৰতিক ৰাজনৈতিক পৰিস্থিতিয়ে সংখ্যালঘু লোকসকলৰ মাজত এক ভয়ৰ পৰিৱেশ সৃষ্টি কৰা বুলি উল্লেখ কৰি তেওঁ সংখ্যালঘুৰ সুৰক্ষা, মূল্যবৃদ্ধি আৰু বৈষম্যৰ দৰে বিষয়সমূহৰ ওপৰত গভীৰ উদ্বেগ প্ৰকাশ কৰে।
ইয়াৰ উপৰিও গেছ, পেট্ৰ’ল আৰু অন্যান্য অত্যাৱশ্যকীয় সামগ্ৰীৰ মূল্যবৃদ্ধিক লৈ আজমলে বিজেপি নেতৃত্বাধীন চৰকাৰক তীব্ৰ সমালোচনা কৰে। তেওঁ কয় যে মূল্যবৃদ্ধি নিয়ন্ত্ৰণ আৰু দৰিদ্ৰতা নিৰ্মূলকৰণ তেওঁলোকৰ প্ৰধান লক্ষ্য হৈ থাকিব। ৰাজ্যখনত চলি থকা উচ্ছেদ অভিযানৰ প্ৰসংগত আজমলে চৰকাৰক আহ্বান জনায় যে মানুহৰ বিৰুদ্ধে ব্যৱস্থা লোৱাৰ আগতে চৰকাৰে সঠিক অনুসন্ধান আৰু পুনৰ্সংস্থাপনৰ ব্যৱস্থা কৰিব লাগে। তেওঁ স্পষ্ট কৰি দিয়ে যে তেওঁৰ দলে এই বিষয়সমূহ ৰাজনৈতিক আৰু আইনীভাৱে উত্থাপন কৰি যাব আৰু প্ৰয়োজন হ’লে উচ্চতম ন্যায়ালয়ৰো কাষ চাপিব। নিৰ্বাচিত নেতাসকলে সদায় জনসাধাৰণৰ কল্যাণৰ বাবে কাম কৰা উচিত বুলি মন্তব্য কৰি তেওঁ কয় যে দৰিদ্ৰতা, মূল্যবৃদ্ধি আৰু সাধাৰণ মানুহৰ সমস্যাৰ বিৰুদ্ধে তেওঁলোকৰ যুঁজ সদায় অব্যাহত থাকিব।
