প্ৰায় ৮৯ আৰৱ ডলাৰ অৰ্থাৎ ৬.৪ লাখ কোটি টকাৰ মালিক আৰু বিশ্বৰ আটাইতকৈ বৃহৎ শ্বেয়াৰ বাজাৰৰ বিনিয়োগকাৰী ৱাৰেন বফেটে এতিয়ালৈকে মাত্ৰ ২০ ডলাৰ অৰ্থাৎ ১৪০০ টকাৰ ছেমছাঙৰ এটা ফোন ব্যৱহাৰ কৰিছিল।
এতিয়া তেওঁ iPhone লৈ ফুৰিব। তেওঁ এপ’লৰ চি ই অ’ টীম কুকৰ উপহাৰ গ্ৰহণ কৰিছে।
ৱাৰেন বফেট বিশ্বৰ আটাইতকৈ প্ৰসিদ্ধ শ্বেয়াৰ বাজাৰ বিনিয়োগকাৰী আৰু শ্বেয়াৰ বাজাৰৰ বহু বিনিয়োগকাৰীৰ বাবে তেওঁ এগৰাকী মাৰ্গদৰ্শক।
তেওঁ ভাৰতৰ আটাইতকৈ ধনী মুকেশ আম্বানিতকৈয়ো বহুত বেছি ধনী। মুকেশ আম্বানি মুঠ ৬৭ আৰৱ ডলাৰৰহে মালিক।
এপ’লৰ চিইঅ’ টীম কুকে ইয়াৰ পূৰ্বে কেইবাবাৰো ৱৰ্কশ্বায়ৰ হেথৱেৰ চিইঅ’ ৱাৰেন বফেটক আইফোন উপহাৰ দিবলৈ চেষ্টা কৰিছিল যদিও বফেটে কেতিয়াও সেয়া লোৱা নাছিল।
তেওঁ সদায় মাত্ৰ ২০ ডলাৰত ক্ৰয় কৰা ছেমছাঙৰ SCH-U320 মডেলৰ ফ্লিপ ফোন এটা ব্যৱহাৰ কৰিছিল।
এতিয়া তেওঁ ঘোষণা কৰিছে যে তেওঁ আইফোনৰ উপহাৰ গ্ৰহণ কৰিছে। তেওঁ প্ৰায় ১০ বছৰ ধৰি এই সাধাৰণ ফোন ব্যৱহাৰ কৰি আহিছিল।
ইয়াৰ অন্তৰালত থকা তেওঁৰ যুক্তি হৈছে যে তেওঁ ৮৯ বছৰীয়া বৃদ্ধ আৰু এই বয়সত তেওঁৰ বাবে স্মাৰ্টফোন ব্যৱহাৰ কৰাটো সহজ নহয়।
বফেটে এতিয়া উপহাৰ হিচাপে লাভ কৰা এপ’লৰ স্মাৰ্টফোনটোও অকল কলিঙৰ বাবেহে ব্যৱহাৰ কৰিব বুলি জানিব দিয়ে।
উল্লেখযোগ্য যে ৱৰ্কশ্বায়ৰ হেথৱে এপ’লৰ ৫.৬ শতাংশ অংশীদাৰী ক্ৰয় কৰিছে।
বিশ্বৰ ইমান বৃহৎ বিনিয়োগকাৰী গৰাকীয়ে শ্বেয়াৰ বাজাৰৰ অধ্যয়ন, গৱেষণা কেনেদৰে কৰে? এটা ৱেবছাইটৰ মতে, তেওঁ এনেকুৱা কামৰ বাবে এপ’লৰে এটা আইপেড ব্যৱহাৰ কৰে।
