পঞ্চায়ত নিৰ্বাচনৰ প্ৰাকমুহূৰ্তত আকৌ এবাৰ কেন্দ্ৰীয় ৰে’ল ৰাজ্য মন্ত্ৰী ৰাজেন গোঁহাইৰ যৌন কেলেংকাৰী প্ৰসংগই নগাঁৱৰ ৰাজনীতিত তীব্ৰ প্ৰতিক্ৰিয়াৰ সৃষ্টি কৰিছে। উল্লেখ্য,কেন্দ্ৰীয় ৰে’ল ৰাজ্যমন্ত্ৰী ৰাজেন গোঁহাইৰ বিৰুদ্ধে উত্থাপিত যৌন নিৰ্যাতনৰ গোচৰক কেন্দ্ৰ কৰি নগাঁও জিলাত প্ৰতিক্ৰিয়া চলি থকাৰ সময়তে আজি নগাঁও আদালতত ৰাজেন গোহাঁইৰ বিৰুদ্ধে নিজাকৈ গোচৰ ৰুজু কৰি আদালতে তদন্ত প্ৰক্ৰিয়া আৰম্ভ কৰিব বুলি জানিব পৰা গৈছে।
নগাঁৱৰ দেউৰীগাঁৱৰ এগৰাকী নৱবিবাহিতাই যোৱা ২ আগষ্টত যৌন কেলেংকাৰী সন্দৰ্ভত দিয়া এজাহাৰৰ ভিত্তিত সদৰ থানাত ২৫৯২/১৮ নম্বৰত গোচৰ ৰুজু হৈছিল। পৰৱৰ্তী সময়ত গোচৰ প্ৰত্যাহাৰৰ বাবে মহিলাগৰাকীয়ে দিয়া মীমাংসা পত্ৰৰ ভিত্তিত আৰক্ষীয়ে চূড়ান্ত প্ৰতিবেদন আদালতত দাখিল কৰিছিল যদিও আদালতে আজি আৰক্ষীয়ে প্ৰদান কৰা চূড়ান্ত প্ৰতিবেদন নাকচ কৰে। অহা ৮ জানুৱাৰীৰ পৰা নগাঁও জিলাৰ মুখ্য ন্যায়িক দণ্ডাধীশৰ আদালতত চলিব গোচৰ।
উল্লেখ্য যে কেন্দ্ৰীয় ৰে’ল ৰাজ্য মন্ত্ৰী তথা নগাঁৱৰ সাংসদ ৰাজেন গোঁহাইৰ বিৰুদ্ধে নগাঁও সদৰ থানাত যোৱা ২ আগষ্টত ভাৰতীয় দণ্ডবিধিৰ ৪১৭/৩৭৬/৫০৬ ধাৰাত এক গোচৰ ৰুজু হৈছিল। এগৰাকী মহিলাই যৌন নিৰ্যাতন চলোৱা বুলি দিয়া এজাহাৰৰ ভিত্তিত ৰুজু হোৱা গোচৰটোৰ তদন্তৰ ক্ষেত্ৰত আৰক্ষীয়ে লোৱা ভূমিকাই সন্দেহৰ সৃষ্টি কৰিছিল বুলি বিভিন্ন দল-সংগঠনে নগাঁৱৰ উপায়ুক্তৰ জৰিয়তে ভাৰতবৰ্ষৰ প্ৰধানমন্ত্ৰী-ৰাষ্ট্ৰপতিলৈয়ো স্মাৰক পত্ৰ প্ৰেৰণ কৰিছিল।
বলাৎকাৰৰ দৰে গুৰুতৰ অভিযোগ উঠা ৰে’ল ৰাজ্য মন্ত্ৰী ৰাজেন গোঁহাইক আৰক্ষীয়ে সোধা পোচা কৰাতো দূৰৰে কথা ওলোটাই অভিযোগকাৰীয়ে গোচৰ প্ৰত্যাহাৰ কৰা প্ৰসংগতহে আৰক্ষী ব্যস্ত হোৱা পৰিলক্ষিত হৈছিল বুলিও স্মাৰক পত্ৰত উল্লেখ কৰিছিল।
উক্ত গোচৰটোৰ প্ৰত্যাহাৰৰ ক্ষেত্ৰত মন্ত্ৰী গোঁহায়ে ধনবল, বাহুবল আদিৰ সহায়ত অভিযোগকাৰীক ভয়-ভীতি প্ৰদৰ্শন কৰি গোচৰটো গাপ দিয়াৰ সম্পূৰ্ণ পৰিবেশ ৰচনা কৰাৰ সুযোগ পালে বুলিও চৰ্চা লাভ কৰিছিল। কিয়নো ২ আগষ্টত ৰুজু হোৱা গোচৰটো অভিযোগকাৰীয়ে ৬ আগষ্টতহে প্ৰত্যাহাৰৰ বাবে আবেদন জনাইছিল। ইয়াৰ বাবেই আদালতে আজি এনে সিদ্ধান্ত গ্ৰহণ কৰিছে বুলি অনুমান কৰা হৈছে।