ৰাজ্যিক নিৰ্বাচন আয়োগে অহা ১৫ ডিচেম্বৰৰ ভিতৰত পঞ্চায়ত নিৰ্বাচন অনুষ্ঠিত কৰিব বুলি ঘোষণা কৰাৰ পাছতে ৰাজনৈতিক দলসমূহৰ মাজত তৎপৰতা বৃদ্ধি পোৱা পৰিলক্ষিত হৈছে। সেয়ে ৰাজ্য চৰকাৰৰ মিত্ৰ দল অগপইও ৰণপ্ৰস্তুতি চলোৱাৰ উদ্দেশ্যে বুধবাৰে গুৱাহাটীৰ আমবাৰীস্থিত মুখ্য কাৰ্যালয়ত এখন গুৰুত্বপূৰ্ণ সভাৰ আহ্বান জনাইছে।
জানিব পৰা মতে কাইলৈ অনুষ্ঠিত হ’বলগীয়া সভাখনত আলোচনাৰ মূল বিষয়বস্তু হ’ব মিত্ৰতা। বিধানসভা নিৰ্বাচনৰ সময়ত অগপৰে মিত্ৰতা কৰি ৰাজ্যত বিজেপি নেতৃত্বাধীন চৰকাৰ গঠন হৈছিল যদিও পৰৱৰ্তী সময়ত বিজেপি নেতৃত্বাধীন কেন্দ্ৰীয় আৰু ৰাজ্য চৰকাৰে গ্ৰহণ কৰা বহুতো জনবিৰোধী নীতিৰ বাবে এতিয়া অগপই আগন্তুক পঞ্চায়ত নিৰ্বাচনত অকলেই প্ৰতিদ্বন্দ্বিতা কৰাৰ পোষকতা কৰিছে।
ইফালে ৰাজ্যৰ ৰাজনীতি উত্তাল কৰি ৰখা নাগৰিকত্ব সংশোধনী বিধেয়ক প্ৰসংগতো বিজেপি আৰু অগপৰ মাজত কিছু মতানৈক্য সৃষ্টি হোৱা পৰিলক্ষিত হৈছে। সেয়ে এই সকলোবোৰ বিষয় সামৰি আগন্তুক পঞ্চায়ত নিৰ্বাচনৰ বাবে প্ৰাৰ্থী নিৰ্বাচনৰ লগতে অন্যান্য বিষয় সন্দৰ্ভত কাইলৈৰ সভাত আলোচনা হ’ব।
বুধবাৰে দিনৰ ১১ বজাত অনুষ্ঠিত হ’বলগীয়া বৈঠকত সকলো জিলা কমিটিৰ সভাপতি আৰু সাধাৰণ সম্পাদকসকলক উপস্থিত থাকিবলৈ ইতিমধ্যে কেন্দ্ৰীয় কমিটীয়ে নিৰ্দেশ দিছে। দলৰ কেন্দ্ৰীয় কমিটিয়ে জিলা কমিটিৰ নেতৃত্বৰ লগত আলোচনাত মিলিত হৈ নিৰ্বাচন সন্দৰ্ভত বিতং চূড়ান্ত সিদ্ধান্ত ল’ব।
ইফালে সোমবাৰে অগপৰ বিধায়িনী দলৰ কাৰ্যালয়ত দলৰ নিৰ্বাচন কমিটিৰ এখন গুৰুত্বপূৰ্ণ বৈঠক অনুষ্ঠিত হৈ যায়। উক্ত বৈঠকতে পঞ্চায়ত নিৰ্বাচনৰ প্ৰাৰ্থীৰ তালিকা প্ৰস্তুত কৰিবলৈ জিলা আৰু সমষ্টি কমিটি সমূহক দায়িত্ব অৰ্পণ কৰাৰ সিদ্ধান্ত লয়।