নাগৰিকত্ব বিধেয়কৰ বিৰোধিতাৰে ৰাজ্যৰ বিভিন্ন দল-সংগঠন একত্ৰিত হৈ তীব্ৰ প্ৰতিবাদ সাব্যস্ত কৰি অহাৰ সময়তে সোমবাৰে জাতিধ্বংসী বিধেয়কখনৰ বিৰুদ্ধে তামুলপুৰত কেইবাটাও দল-সংগঠনৰ লোকে প্ৰতিবাদ সাব্যস্ত কৰে।
বিধেয়কখন বাতিলৰ দাবীত কালি বাক্সা জিলাৰ তামুলপুৰ মহকুমা সদৰত জিলা কৃষক মুক্তি সংগ্ৰাম সমিতি, অসম গণ পৰিষদৰ জিলা সমিতি, তামুলপুৰ জিলা অবড়ো সুৰক্ষা সমিতি প্ৰমুখ্যে কেইবাটাও দল-সংগঠনৰ লোকে তামুলপুৰৰ ঘগ্ৰাচ’কত দুঘণ্টীয়া ৰাষ্ট্ৰীয় ঘাইপথ অৱৰোধ কৰা দেখা যায়।
প্ৰতিবাদকাৰীসকলে নাগৰিকত্ব বিধেয়ক বাতিল কৰক, নৰেন্দ্ৰ মোদা হুচিয়াৰ, আৰ এছ এছ হুছিয়াৰ, অবৈধ বাংলাদেশীক অসমত থাকিবলৈ দিয়া নহ’ব, অসমৰ পৰা বাংলাদেশী যাবই লাগিব আদি শ্লোগানেৰে প্ৰতিবাদস্থল উত্তাল কৰি তোলে।
ৰাষ্ট্ৰীয় ঘাইপথ অৱৰোধ কাৰ্যসূচীৰ পাছত প্ৰতিবাদকাৰীসকলে তামুলপুৰ মহকুমা প্ৰশাসনৰ জৰিয়তে মুখ্য মন্ত্ৰী সোণোৱাললৈ এখন স্মাৰকপত্ৰ প্ৰেৰণ কৰে।
মঙলবাৰৰ এই প্ৰতিবাদী কাৰ্যসূচীত বাগছা জিলাৰ কৃষক মুক্তিৰ সভাপতিনীলাধৰ কলিতা, সম্পাদক থানেশ্বৰ কলিতা, তামুলপুৰ জিলা অবড়ো সুৰক্ষা সমিতিৰ কাৰ্যকৰী সভাপতি ডিম্বেশ্বৰ ৰাভা, তামুলপুৰ জিলা অগপৰ ভাৰপ্ৰাপ্ত সভাপতি ৰঞ্জিত দাস, তামুলপুৰ আঞ্চলিক কলিতা জনগোষ্ঠী সন্মিলনৰ সম্পাদক, এজেৱাইচিপিৰ লগতে কেইবাটাও দল-সংগঠনৰ নেতা-কৰ্মীয়ে অংশগ্ৰহণ কৰে।
