সংসদীয় ৰাজনীতিলৈ যোৱাৰ মন মেলিছে অগপৰ জ্যেষ্ঠ নেতা বৃন্দাবন গোস্বামীয়ে। ২০১৯ৰ লোকসভা নিৰ্বাচনত তেজপুৰ সমষ্টিৰ পৰা প্ৰতিদ্বন্দ্বিতা কৰিব অগপৰ এসময়ৰ সভাপতি তথা বৰ্তমানৰ বিধায়কজনে।
অৱশ্যে, এই কথা এতিয়াও আনুষ্ঠানিকভাৱে সদৰী কৰা হোৱা নাই যদিও অগপৰ এটা সূত্ৰই নৰ্থ-ইষ্ট নাওক এই কথা জানিবলৈ দিছে।
ইপিনে, নৰ্থ-ইষ্ট নাওৰ সাংবাদিকৰ সৈতে হোৱা বাৰ্তালাপত বৃন্দাবন গোস্বামীয়ে কথাটো অস্বীকাৰ কৰা নাই যদিও নিৰ্বাচনলৈ সময় যথেষ্ট কম গতিকে এতিয়াই একো সিদ্ধান্ত ল’ব পৰা নাই বুলি মন্তব্য কৰে।
অৱশ্যে তেওঁ কয়, “তেজপুৰ লোকসভা সমষ্টিৰ বহু সংখ্যক অগপ কৰ্মী-সমৰ্থকে মোক লোকসভাত অৱতীৰ্ণ হোৱাটো বিচাৰিছে। দলৰ মজিয়াতো এই বিষয়ে চৰ্চা চলিছে। দলে কি সিদ্ধান্ত লয় তাৰ ওপৰতে সকলো নিৰ্ভৰ কৰিব।”
তেওঁ লগতে কয়, “মই প্ৰাৰ্থী হও বা নহও, কিন্তু জাতিৰ সংকট কালত অসমৰ হৈ দিল্লীত মাত মাতিব পৰা প্ৰতিনিধি লাগে। সেই কথা অসম গণ পৰিষদে গুৰুত্ব সহকাৰে লৈছে।”
অৱশ্যে গোস্বামীয়ে বৰ্তমান তেজপুৰ বিধান সভা সমষ্টিত তেজপুৰ ইন্টাৰ ষ্টেট বাছ টাৰ্মিনাছ, তেজপুৰ বিশ্ববিদ্যালয়ত এটা ক্ৰীড়া প্ৰকল্প, সমষ্টিটোৰ বাট-পথ সমুহৰ নিৰ্মাণকে ধৰি কেইবাটাও উন্নয়নমূলক কামতহে আত্মনিয়োগ কৰি থকা বুলি জানিবলৈ দিয়ে।
উল্লেখযোগ্য যে অগপৰ জন্মলগ্নৰ এগৰাকী নিষ্ঠাৱান নেতা হিচাপে গোস্বামীয়ে অগপৰ প্ৰথমটো কাৰ্যকালত শিক্ষা মন্ত্ৰীৰ দায়িত্ব লাভ কৰিছিল। তদুপৰি, পৰৱৰ্তী সময়ত অগপৰ সংকট কালত তেওঁ সভাপতি পদত অধিষ্ঠিত হৈ দলটোক আগবঢ়াই নিয়াৰ চেষ্টা কৰিছিল।
